Жатайдааҕы суудунаны тутар собуот бастакы сакаастары номнуо түмүктээн эрэр

Жатайдааҕы суудуналары оҥорон таһаарар собуот 2019 сыллаахтан тутулла турар. Билигин собуот тутуутун үлэтэ иккис түһүмэҕэр киирдэ. Бу сайынтан саҕалаан Тыа хаһаайстыбатын министиэрстибэтин анал бырагырааматынан дьоҕус паромнару оҥорон саҕалаата.

Дмитрий Садовников, СӨ Бырабыытылыстыбатын бэрэссэдээтэлин бастакы солбуйааччыта: "Бастакы скаастар номнуо оҥоһулланнар, сакааһы биэрбит тэрилтэҕэ туттарыллаары сылдьар. Аны тутуу иккис түһүмэҕэ этэҥҥэ түмүктэнэн өссө улахан сакаастарга киириэхтэрэ диэн эрэнэбит".

Суудунулары оҥорон таһаарар собуот бастакы парома 19 миэтэрэ уһуннаах, ыйааһына 20 туонна. Бу аалы бастакынан Сунтаар улууһа оҥотторор.  Бу ый бүтүүтэ бэлэм буолуоҕа. Ол кэннэ тустаах үлэһиттэр парому тургутан көрүөхтэрэ.

Семён Коркин, СӨ тырааныспар миниистирин солбуйааччы: "Докумуон үлэтин, аалы тургутууну барытын аһардан баран туттарыахтаахпыт. Паром 20 мөл. солк. сыаналанна. Бастакы тутуу син биир ыарахан буолар. Оттон ааллары тутуу тиһигэр киирдэхпитинэ сыананы түһэриигэ үлэлэһиэхпит".

Былааҥҥа өссө улахан устар ааллары оҥоруу турар. Маны таһынан собуокка муосталар оҥоһуллуохтара. Маныаха эдэр исписэлиистэри эрдэттэн бэлэмнээн бастакы үлэһиттэр бааллар. Аан бастакы ураты собуот ситэри үлэҕэ киирдэҕинэ 600-чэкэ үлэ миэстэтэ тахсыаҕа.

Влад Пермяков, "Жатайская судоверфь" АО генеральнай дириэктэрэ: "Жатайдааҕы техникуму кытта сөбүлэҥнээхпит. Санкт-Петурбургтааҕы Балтийскай собуот уонна Карелияҕа баар собуоту кытта эмиэ хардары сөбүлэҥнээхпит. Техникум оҕолоро онно бүтэһик семестрдарыгар онно үлэлииллэр".

Үлэһиттэргэ анаан манна олорор уонна уопсай дьиэлэр тутулла тураллар. Тутуу 4 тыһыынчаттан тахса кыбдыраатынай миэтэрэ иэнннээх 200 миэстэллэх буолуоҕа. Сотору кэминэн тутуу үлэтэ түмүктэнэн үлэҕэ киириэҕэ.