Түөһэйиини эмтиир устуудьуйа арылынна

Өй-мэйии үлэтин сайыннарыыга туһуланар кабинет  үлэлээбитэ нэдиэлэттэн оппут. Онон манна дьарыктанааччылар номнуо үтүө түмүктэри көрдөрөллөр. Түөһэйии курдук ыарахан ыарыыга кэнники сылларга болҕомто дьэ улаатан эрэр. Оттон саҥа арыллыбыт "Уһуннук олоруох" устуудьуйа бу кыһалҕаны быһаарыыга биир сүрүн хардыы.  

Наталья Иванова, Өрөспүүбүлүкэтээҕи 3№-дээх клиническэй балыыһа клиническэй психолога: “Бастакы киириибит. Манна иккилии нэдиэлэ эмтэнэллэр. Күне аайы 14-18 чааска диэри күнүскү өттүгэр сылдьаллар. Бу кэмҥэ быраас анаабыт эмтэрин ылаллар.Ону таһынан күн аайы өй-мэйии үлэтин сайыннарар дьарыктар буолалла”.

Бу дьоһуннаах бырайыак Президент граанын пуондатын өйөбүлүнэн олоххо киирэн үлэлиир. Манна аҕам саастаахтары тэҥэ күүстээх үлэ кинилэр оҕолорун, аймахтарын кытта барар. Устуудьуйа өрөспүүбүлүкэ бүттүүнүн хабар. Ыраах сытар улуустары кытта тэйиччиттэн эмиэ дьарыктанар.

Наталия Каратаева, "Уһуннук олоруох" тэрилтэ дириэктэрэ: “Биһиэхэ медицинскэй психологтар, педагогтар үлэлииллэр. Ону тэҥэ сотору кэминэн нейротренер диэн саҥа исписэлиистэри үөрэтиэхтээхпит. Устуудьуйа уратыта диэн күнүскү киин эрэ курдук үлэлээбэт, биһиги атын балыыһаларга эбэтэр сытар ыарыһахтарга дьиэлэригэр баран үлэлиибит”.

Саха сиригэр күн бүгүн түөһэйии ыарыылаах  103 киһи баар. Бу чопчуламмытынан эрэ. Исписэлиистэр этэллэринэн дьиҥ көрдөрүү чыҥха атын.

Ольга Татаринова, СӨ доруобуйа харыстабылын министиэристибэтин сүрүн гериатр бырааһа: «Биһиги ааҕарбытынан Саха сиригэр түөһэйии ыарыылаах 5000-8000 кыһи баар буолуохтаах. Дьиҥ көрдөрүүгэ тахсыыга үлүгэрдээх улахан үлэ барыан наада».  

Билигин  үйэни уһатыы дойду биир сүрүн соруктарыттан биирдэстэрэ. Бу сылтан маныаха туһулаан "Уһун уонна көхтөөх олох" диэн саҥа национальнай бырайыак үлэлиир. Оттон "Уһуннук олоруох" курдук устуудьуйалар бырайыак олоххо киириитин көҕүлүүллэр, кыһалҕалаах дьоҥҥо дьоһун көмөнү оҥороллор.  

Наталья Степанченко, "Уһуннук олоруох" устуудьуйаҕа дьарыктанааччы кыыһа: “Биһини устуудьуйаҕа ыҥырбыттарыттан олус диэн үөрэбит. Ийэм дьарыктарга сылдьар, дьону кытта алтыһар, урут умнубут үөрүйэхтэрин төннөрөр”.

Доруобуйа аан дойдутааҕы тэрилтэтэ этэринэн 60 саастарын ааспыт хас үһүс киһи умнуган буолар кутталлаах. Онон өйү-мэйиини эччийии, түөһэйии курдук ыарыыны сэрэтии улахан суолталаах.