Дьаҥнааһын уонна тымныйан ыалдьыы көрдөрүүтэ үрдээбит

Иккис оскуола, 8-с кылааһын  үөрэнэччилэрэ дистанционнай үөрэххэ көстүлэр. Онон уруок бүгүн экран нөҥүө ыытыллар. Физика учуутала Валентин Платонов уруок төһө да онлайн быһылаахтык бардар, оҕолор үөрэх быраграматыттан хаалбаттар. Маннык уларыйыыга оскуола бэлэмнээх.

Валентин Платонов, Дьокуускайдааҕы национальнай политехническай 2-с №-дээх  оскуолатын учуутала: «Уруок ыытан бүттүм, биир уруок 20-30 мүнүүтэ курдук ааһар уонна хаалбыт бириэмэҕэ сорудахтары биэрэбин».

Үөрэх кыһаларыгар кылааска 20 быраһыан оҕо ыалдьыбыт түгэнигэр кылаас барыта дистанционнай үөрэххэ көһөр. Күн бүгүн бу оскуола 1900-тэн тахса үөрэнээччилээх,  икки кылаас карантинна олорор.

Василий Владимиров, Дьокуускайдааҕы национальнай политехническай 2-с №-дээх оскуолатын дириэктэрэ: «Чараастык сылдьар буоланнар уонна ОРВИ баар дииллэр. Биһи оскуолабытыгар уоапсайа 62 кылаастаахпыт. Бүгүҥҥү күҥҥэ 2 кылаас карантиҥҥа бардылар. Кылааска 20% ыарыйдаҕына караниҥҥа ыытабыт».

Ыарыы көрдөрүүтэ бүттүүн Өрөспүүбүлүкэ үрдүнэн улаатан турар. Нэдиэлэ саҕаланыытыттан 7 тыһыынчаттан тахса киһи ыалдыьбыта. Ааспыт нэдилэттэн 97% үрдээтэ диэн Саха сиринээҕи Роспотребнадзор иһитиннэрэ. 

Ирина Гольдерова: «Бу күннэргэ Дьокуускай куорат аптекаларыгар киһи эмиэ толору, сүрүннээн дьон-сэргэ вирус утары иһиллэр эми хамаҕатык ылаллар. Ыарыы эмискэ үрдээһинэ дьыл кэмэ уларыйттын кытары ситимнээх»

Саха сиригэр вакцинация хампаанньата өссө атырдьах ыйын бүтүүтэ саҕаламмыта. Дьокуускайдааҕы 3 нүөмэрдээх балыыһаҕа киһи толору. Манна нэһилиэнньэҕэ икки көрүҥ быһыыны туруораллар. Быһыы хампаанньата саҕаланыаҕыттан  3 тыһ.  кэриҥэ киһи тумуу  утары прививкаланна.

Раиса Аржакова, Дьокуускайдааҕы 3 №-дээх балыыһа терапевт бырааһа: «Тэрилтэлэргэ эмиэ тахсабыт, үлэлии сылдьар дьоҥҥо туруорабыт. Ону кытта холбоотоххо күҥҥэ 300-чэкэ курдук киһини хабан олоробут. Икки көрүҥ вакциналаахпыт».

Бу балыыһа былаан быһыытынан 70 тахса тыһыынча киһиэхэ быһыы туруоруохтаах. Бүгүҥҥү күннэ Өрөспүүбүлүкэ вакцинанан хааччыллыта толору. Туһумэҕинэн кэлэ турар. Күн бүгүн 332 тыһ тахса дозаны номнуо аҕаллылар. Бу барыта Дьокуускай куоратынан уонна улуустарынан тарҕаныаҕа.