Анал байыаннай дьайыыга сылдьар биир дойдулаахтарбытыгар көмө салҕанар

Дьокуускай куорат олохтооҕо, амарах санаалаах волонтер Зинаида Дмитриевна 76 сааһыгар барда. Бу ыстаапка кэлэн көмөлөспүтэ биир сыла буолла. Кини билигин Саха Өрөспүүбүлүкэтин судаарыстыбаннаһын күнүн көрсө байыастарга анаан анал сакаас тигэ сылдьар.

Зинаида Иванова, волонтёр: «Саха сирин былааҕын наадыйаллар, уоппускаҕа кэллэхтэринэ маннык сырдыгы кэтэллэр. Полевой усулуобуйаҕа манныгы кэтэллэр».

Иистэнньэннэр билигин үлэ түбүгэр сылдьаллар - байыастарга анаан көстүүм, сылаас таҥас тигэллэр.

Ыстаапка сүрүннээн ийэлэр, аҕалар, эбээлэр кэлэн күүс-көмө буолаллар. Маны таһынан тэрилтэлэр, түмсүүлэр, биирдиилээн да дьон анал байыаннай дьайыы кыттыылахтарыгар өйөбүл буолаллар. Хас күн аайы таҥас-сап, эмп, бородуукта тиһигин быспакка кэлэ турар. 

Владимир Заморсев, волонтёр: «Биирдиилэн волонтердар аҕалаллар. Холобур, ааспыкка 1982 сыллаах выпусктар көмө аҕалбыттара».

Бу курдук амарах санаалаах волонтердар байыастарга анаан хомуллубут гуманитарнай көмөнү ыытаары бэлэмнииллэр. Бу көмө барыта хомуллан балаҕан ыйын 25 күнүгэр айанныаҕа. 

Анна Ефимова, “Якутия с тобой” общественнай хамсааһын бэрэссэдээтэлэ: «Улахан массыына бараары турар. Онно нэһилиэньэттэн туонна курдук көмөнү туттубут. Уонна адреснай баһыылкалары төрөппүттэр аҕала тураллар. Билигин эбии өссө аҕалыаххытын сөп. Билигин сүрүннээн төрөппүттэр халыҥ таҥастары ыталлар, ону таһынан буорту буолбат астары ыыта тураллар».

Бу курдук бары түмсэн, ким да туора турбакка анал байыаннай дьайыы кыттыылаахтарыгар бэйэлэрин көмөлөрүн ууран, сэмэй кылааттарын киллэрэллэр.