Өрөспүүбүлүкэтээҕи Муусука үрдүкү оскуолатын саҥа дьиэтэ тутуллар

Муусука үрдүкү оскуолатын тутуута тэтимнээхтик бара турар. Манна билигин 70-тан тахса үлэһит, хас да биригээдэнэн арахсан үлэлии сылдьар. Бу сыл бүтүүтэ тутуу бастакы түһүмэҕэ түмүктэниэхтээх.

Ион Афанасьев, тутуу инженерэ: «Быйылгы былаан туолара чугаһаата, алтынньы ыйга дылы сылаас куонтурун сабыахтаахпыт. Хочуолунайбыт тутулла сылдьар, кыраапыгы иннилээн иһэр диэххэ сөп».

Саҥа тутуу Саха сиригэр олус күүтүүлээх уонна улахан суолталаах эбийиэк буолар. Үөрэх куорпуһун таһынан 150 миэстэҕэ анаммыт интернат дьиэ итиэннэ оҕо оонньуур уонна спортивнай былассаакката тутуллуоҕа.

Бу оскуолаҕа үөрэниэн баҕалаах оҕо сылын аайы элбээн иһэр. Күн бүгүн оскуолаҕа 270-тан тахса үөрэнээччи муусука кэрэ эйгэтигэр уһуйуллар. Үөрэнээччилэр, төрөппүттэр саҥа үөрэх кыһата тутуллан үлэҕэ киирэрин бары долгуйа күүтэллэр.

Надежда Зайкова, СӨ Муусука үрдүкү оскуолатын дириэктэрэ: «Саамай баҕараллара бу дьиэ хаһан киирэ охсоруй диэн. Кырачааннар наһаа үөрэллэр, бу оскуолаҕа үөрэнэбит диэн».

Муусука үрдүкү оскуолатын 1993 сыллаахха Саха сирин бастакы Президиэнэ Михаил Николаев көҕүлээһининэн тэриллибитэ. Бу оскуола - оҕо дьоҕурун өссө сайыннаран, талаанын арыйарга кыах биэрэр.

Надежда Зайкова, СӨ Муусука үрдүкү оскуолатын дириэктэрэ: «Айсен Сергеевич Николаевка улаханнык махтаныахпын баҕарабын. Тоҕо диэтэххэ соторутааҕыта оперативнай штаб ыытан турардаах. Онно сүрүн боппуруос быһыытынан көрүллэн турар, биһиги оҕолорбутугар рояль игин ыларбытыгар харчы көрөөһүнэ диэн. Өрөспүүбүлүкэ ону хааччыйар, көмөлөһөр биһиэхэ. Федеральнай харчыбыт кэлэ турар, хантараак түһэрбиттэрэ. “Сэттэ” диэн хампанньа бэрт үчүгэйдик үлэлии сылдьар».

Үөрэнээччилэр Арассыыйаҕа эрэ буолбакка, аан дойдуга тиийэ биллэллэр, элбэх ситиһилэнэллэр. Дойду Президиэнэ Владимир Путин сорудаҕынан, саҥа муусука үрдүкү оскуолата 2026 сыл бүтүүтэ тутуллан киириэхтээх.