Өрөспүүбүлүкэ үрдүнэн ыарыыны утары быһыыны туруоруу салҕанар

Дьокуускай балыыһаларыгар киһи кэлиитэ элбээн, уһун уочарат. Бу 3-с нүөмэрдээх поликлиникаҕа билигин биир этээс бүтүннүү тумуулаабыт уонна грипптээбит киһи. Манна оҕолорго уонна уолахан дьоҥҥо тэҥинэн суһал көмө биир сиргэ оҥоһуллар.

Татьяна Барашкова, Дьокуускайдааҕы 3 №-дээх балыыһа кылаабынай бырааһын эмтиир үлэҕэ солбуйааччыта: «Үөрэх дьыла саҕаланыаҕыттан көрдөрө кэлэр дьон ахсаана элбээтэ. Оҕолор ахсааннара быдан элбээтэ. Балаҕан ыйын бастакы нэдиэлэтигэр 400-тэн тахса оҕо кэлэн көрдөрбүт буоллаҕына, билигин номнуо 1200 киһи ааспыт нэдиэлэҕэ кэлэн барда».

Үөрэх, үлэ кэмэ саҕаланан билигин ордук оскуолаҕа, оҕо уһуйааннарыгар сылдьан оҕолор ордук ыарыыга хаптараллар. Бу маннык көстүү син биир сыллата хатыланар. Элбэх киһи тоҕуоруһар сирдэригэр бу кэмҥэ араас вирус баар. Ордук риновирус, парагрипп, аденовирус курдук ыарыылар тураллар. Күн бүгүн киин куоракка эпидемиологическай боруогу куоһарыы 6 бырыһыаҥҥа тэҥнэстэ.

Валентина Григорьева, Роспотребнадзор Саха сиринээҕи салалтатын эпидемиология салаатын салайааччытын солбуйааччыта: «Хас сылын аайы бу кэмҥэ ОРВИ таһыма үрдүүр. Билигин арыый үрдүк . Бу кэмҥэ хонтуруолга баар, эпидпоруогу улаханнык куоһарбат. Билигин ордук риновирус уонна коронавирус баар».

Ыарыы көрдөрүүтэ үрдээбитинэн билигин быраастар ОРВИ, грипп утары быһыыны ылары сүбэлииллэр. Ордук оскуола, оҕо уһуйаанын үлэһиттэрэ ылаллара булгуччулаах. Үөрэх эйгэтин үлэһитэ Ирина Васильевна Протопопова булгуччу эрэ диэн буолбакка бэйэтэ ыарыыттан харыстанан сыллата быһыыны ылар. Бу да сырыыга биир бастакынан туруоттара сылдьар.

Ирина Протопопова, Дьокуускай куорат олохтооҕо: «Сыллата ылар прививкабыт. Быйыл саҥа Флю-М прививканы боруобаланным. Бэйэм сыл аайы ылабын».

Бу үһүс нүөмэрдээх балыыһаҕа быһыы ылааччы толору. Тустаах медиссиинэ киинэ 70 тахса тыһыынча киһиэхэ быһыы туруоруохтаах. Оттон күн бүгүн өрөспүүбүлүкэҕэ грипп, ОРВИ утары вакциналар түһүмэҕинэн кэлэн эрэллэр. Ол курдук, билигин 332 тыһ. тахса дозаны номнуо аҕаллылар. Салгыы аны алтынньы ыйыгар кэлэрэ күүтүллэр.