Саха сирин аграрийдара туораахтаах култуураҕа региоҥҥа хаһан да буолбатах көрдөрүүгэ чугаһаатылар

Мэҥэ сиригэр хаһаайыстыбалаахтарга хомуур үлэтин үгэнэ. Быйыл Чүүйэ нэһилиэгэр 23 гааҕа  судан оту аан бастакытын ыһан, өлгөм үүнүүнү ыллылар. Былаан быһыытынан аграрийдар 600 туоннаны хомуйаллара күүтүллэр. Быйыл тустаах улууска туораахтаах култуура үүнүүтэ үчүгэй, хаһаайыстыбалар номнуо былаан улахан аҥаарын толорон олороллор. Маны тэҥэ хортуоска уонна атын оҕуруот аһын көрдөрүүтэ эмиэ үчүгэй.

Василий Бурнашев, Мэҥэ Хаҥалас улууһун сүрүннүүр агронома: «Хортуоппуй үүннэриитигэр 15 хаһаайыстыба дьарыктанар. Бүгүҥҥү күҥҥэ 100 га номнуо хомуйдулар. Улууспут үрдүнэн 590 га баар. Хомуур үлэтигэр техникум оҕолоро үлэлии сылдьаллар уонна оскуола үрдүр кылаас үөрэнээччилэрэ. Орто үүнүүбүт биир гектартан 85 центнерга тэҥнэстэ. Быйыл үүнүүбүт үчүгэй».

Оттон бу киин куорат биир бөдөҥ хаһаайыстыбатыгар хомуур үлэтигэр промышленнай техникум устудьуоннара көмөлөһө сылдьаллар. Тустаах техникум устудьуоннара номнуо 30 сыл бу Ким хаһаайыстыбаҕа күһүҥҥү хомуурга көмөлөһөллөр. Бастакы куурустан саҕалаан үһүс кууруска тиийэ бары кэлэллэр.

Айаал Докторов, Т.Г. Десяткин аатынан Дьокуускайдааҕы бырамыысылыннас техникумун дириэктэрэ: «Биһиэхэ хортуоппуй уонна хаппыыста бэрсэллэр. Остолобуойбутугар үөрэнээччилэрбитин босхо аһатабыт».

Билигин хортуоппуйу хомуйарга табыгастаах күннэр тураллар. Бааһынаҕа хас да тиэхиникэ уонна дьон тэҥинэн биир хамаанда буолан үлэлииллэр. Үлэни тэтимирдэр сыалтан тустаах хаһаайыстыба кыра мөһөөччүктэргэ буолбакка хортуосканы тута  сүүһүнэн киилэ батар улахан мөһөөччүктэргэ мунньар.

Уопсайынан быйыл өрөспүүбүлүкэ үрдүнэн үүнүү куһаҕана суох. Сүрүннээн, туораахтаах култуураҕа көрдөрүү үчүгэй. Маны тэҥэ хортуоскаҕа уонна оҕуруот аһыгар эмиэ былаан туолар чинчилээх.

Николай Афанасьев, СӨ тыа хаһаайыстыбатын миниистирин солбуйааччы: «По картофелю при плане в 75 тысяч тонн собрано 33%, 25 тысяч тонн. Урожайность неплохая, 100 центнеров с гектара. По овощам план 28700 тонн, из них выполнено 9000 тонн, 32%, тоже урожайность в этом году неплохая».

Онон билигин хаалбыт күннэри баттаһа Саха сирин аграрийдара бары былааны толорору ситиһиэхтэрэ. Билигин хортуосканы, сүбүөкүлэни хото хомуйаллар. Оттон саамай бүтэһик хаппыыстаны уонна моркуобу ылыахтара.