Дьокуускай куорат төрүттэммитэ 393 сылын бэлиэтиир тэрээһиннэр бу өрөбүллэргэ ыытылыннылар

Болуоссат, уокурук аайы кэнсиэр, ас-үөл, атыы-эргиэн дьаарбаҥката, быыстапкалар, уруккуну-билиҥҥини кэрэһэлиир хаартыскалар, уруһуйдар дьон дьүүлүгэр турдулар.

Үгэс быһыытынан Ил Дархан Айсен Николаев уонна Дьокуускай куорат баһылыга Евгений Григорьев эргэ куоракка айар талааннаахтар быыстапкаларын көрдүлэр, дьону, норуоту кытта сомоҕолостулар.

Дьокуускай куорат олохтооҕо, норуот маастара Татьяна Шишигина куорат күнүн көтүппэт, быыстапкаҕа сылын аайы кыттар. Айан-тутан оҥорбут оҥоһуктарын, итиэннэ бу сыллар устата хомуйан муспут былыргы маллары эмиэ көрдөрүүгэ туруорбут.

Татьяна Шишигина, норуот маастара: «Олус элбэх эдэр ыччат кэлэр. Кинилэр билбэттэр, “Бу тугуй?” – диэн ыйыталлар. Ол аайы мин барытын кэпсиибин тугу билэрбинэн».

Эргэ куоракка турбут быыстапкаҕа эдэр маастардар, уустар оҥорбут оҥоһуктара эмиэ турдулар, элбэх киһи сэнээритин ыллылар

Людмила Федорова, маастар: «Кэлии дьон сүрдээҕин интириэһиргииллэр хайдах курдук саха култуурата дириҥин, кыраһыабайын сэргииллэр аҕай».

Ыччакка, кырачааннарга хас да хайысханан арахсан элбэх былассаакка үлэлээтэ. Маны таһынан оҕолор киин куорат төрөөбүт күнүгэр анаммыт тэрээһиннэргэ эмиэ көхтөөх кыттыыны ыллылар.

Дьокуускай куорат төрөөбүт күнүн көрсө нэдиэлэ устата олохтоохторго араас тэрээһиннэр, бэстибээллэр ыытыллыннылар. Аһаҕас халлаанна кэнсэрдиэр, күрэхтэр буоллулар.

Халлаан да туран биэрдэ диэн олохтоохтор үөрэллэр. Сылын аайы куораппыт тупсан, сайдан иһэр диэн санааларын үллэстэллэр.

Розалия Поскачина, Дьокуускай куорат олохтооҕо: «Сайдыан баҕарабыт, олохтон хаалсыбакка, элбэх тутуулардаах кыраһыабай куорат буоларын баҕарабыт. Онно биһи олохтоохтор эмиэ кыһаллыахпытын наада».

Эдуарда Саввина, Дьокуускай куорат олохтооҕо: «Тапталлаах Дьокуускай куораппыт өссө да сайдан истин».

Дьокуускай куорат сайдыыта 2030 сылга диэри маастар-былаанна бигэргэнэн үлэлии турар. Ирбэт тоҥҥо турар киин куорат дьон-сэргэ олороругар, үлэлииригэр, үөрэнэригэр бары өттүнэн табыгыстаах уонна сайдыылаах буолуохтаах.

Евгений Григорьев, Дьокуускай куорат баһылыга: «Билиҥҥи туругунан 94 улахан бырайыактан 25 оҥоһулла турар, 4 номнуо оҥоһулунна. Куораппыт былаан быһыытынан сайда турар, ол сүрдээҕин үөрдэр».

Аны сэттэ сылынан Дьокуускай куорат 400 сыллаах үбүлүөйүн көрсө - сайдыыга, эйгэни тупсарыыга улахан сыал-сорук турар.