Саха сиригэр күһүн быйыл уһаата

Саха сирин хотугу улуустарыгар кыһыҥҥы хартыына. Өймөкөөн, Муома улуустарыгар бу күннэргэ хаардаабыта. Инчэҕэй хаардаах, ардахтаах күн-дьыл Халыма тардыытыгар эмиэ бэлиэтэммитэ.

Бу көстүү Саха сиригэр көмүс күһүн кэлбит бэлиэтэ буолар.  Киин, илин эҥэр улуустарыгар түүнүн кыралаан тоҥорон эрэр. Тымныы салгын күнүһүн да биллэр буолла.

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаатын салайааччыта: «Бу былыт бүгүн киин оройуоннарга ааһыа. Өрөбүл күннэргэ муора салгына хотуттан киин-арҕаа оройуоннарга дайан тымныы сөҥүүлээх буолуоҕа. Хоту, хотугулуу-арҕаа тымныйыаҕа, сорох сирдэринэн хаар халыҥнык түһүөҕэ».

Дьокуускай куоракка бу күннэргэ сылаас, ичигэс күннэр турдулар. Сылаас күннэри баттаһа дьон-сэргэ ордук сибиэһэй салгынна, айылҕаҕа тардыһар.

Маннык уһун, ардаҕа суох күһүн саха дьонугар сэдэх көстүү буолар.  Учуонайдар кэтээн көрүүлэринэн бүтэһик 20 сыл иһигэр күһүн уонна саас күннэрэ уһаабыт, нуорматтан 1,5-2 кыраадыска диэри сылыйбыт.

Моисей Захаров, М.К. Аммосов аатынан ХИФУ естественнай наукалар институтун дириэктэрин солбуйааччы, доцент: «Аномальнайдык үрдүк. Кыстык хаар төһө уһуннук сытара уларыйар. Холобур, 2021 сыллаахха буолбут баһаарга сөҥүү түһүүтэ кыччаабыта. Бүтэһик 20 сыл иһигэр саамай кураан сыл буолбута. Быйыл наһаа оннук буолбатах».

Учуонайдар этэллэринэн кэнники сылларга килиимэт уларыйааһына, олох тэтимэ түргэтиир, онон үөрэтии, чинчийии үлэтэ салҕанар. Оттон күнү-дьылы кэтээн көрөр сулууспа иһитиннэрэринэн сылаас күннэр манан тохтооботтор. Бу күннэргэ түүнүн 2-4 кыраадыс тымныйыаҕа. Күнүһүн орто температура 15-17 кыраадыска тиийэ сылыйыаҕа.