Өрөспүүбүлүкэҕэ оттук кэмэ саҕаланна

Ярославскай аатынан 30/1№-дээх дьиэтигэр оттукка бэлэмнэнии үлэтэ болдьохтон хаалан иһэр. Миниистир бэдэрээччити кытта бу төрүөтүн быһаарар.

Бэлиэтээн эттэххэ, тустаах дьиэ 1970-с сыллардааҕы тутуу. Манна хапытаалынай өрөмүөн өссө 2018 сыллаахтан ыытыллар. Бу сылга ордук ититии ситимигэр болҕомтону уураллар. Ол эрэн, оттук кэмэ саҕаланара икки нэдиэлэ хаалла, онон бу кэм иһигэр бэдэрээччиккэ ититии ситимин бэлэм оҥороругар сорудах бэрилиннэ.

Оттон бу Ярославскай аатынан 5/1 №-дээх дьиэтигэр күн бүгүн оннуттан өрөмүөн үлэтэ 99% бэлэм. Бэдэрээччит билигин подъезд истиэнэлэрин кырааскалаан түмүктээн эрэр. Оттон ититии ситимин манна бүтүннүү өрөмүөннээн бүтэрбиттэр. Онон оттук кэмигэр киирэргэ тустаах дьиэ бэлэм.

Фёдор Лукин, Оннуттан өрөмүөн үлэтигэр пуонда сүрүн инженерэ: “Уопсай былаантан өрөспүүбүлүкэ үрдүнэн биһиги оттук кэмигэр диэри 40 диэни баттастыбыт. Олортон 19 дьиэ Дьокуускай куоракка уонна 4 дьиэни бүгүн көрдүбүт. Улахан аҥаара оҥоһулунна. Үлэ түмүктэнээри турар. Сылаас биэрэллэригэр бэммит диэххэ сөп”.

Киин куоракка социальнай эбийиэктэргэ сылааһы балаҕан ыйын 8 күнүттэн биэрэн саҕалыахтара. Оттон олорор дьиэлэргэ халлаан туругуттан көрөн, быһа холоон бу ый 15 чыыһылатыттан, ититии ситимин холбуохтара. Билигин сүрүннээн докумуоннааһын үлэлэрэ ыытыллаллар.

Владислав Слепцов, Дьокуускай куорат баһылыгын олох-дьаһах коммунальнай хаһаайыстыбаҕа солбуйааччы: “Докумуоннааһын үлэтин аҥаарын бүтэрдилэр. Техническэй өттүнэн дьиэлэр бэлэмнэр. Докумуон улахан аҥаара итиини биэрэр тэрилтэлэргэ сөбүлэҥҥэ сытар. Кинилэр көҥүл биэрдилэр эрэ аахта, пааспар оҥоробут. Бу үлэни балаҕан ыйын 15 күнүгэр диэри түмүктүөхтэхпит”.

Оттон өрөспүүбүлүкэ үрдүнэн оттук кэмэ номнуо саҕаламмыта. Ол курдук, биир бастакынан, буоларын курдук, хоту  улуустарга ититии ситимин холбообуттара. Маныаха быйыл сүрүн болҕомто ууга барбыт улуустарга уурулунна.

Вячеслав Емельянов, СӨ олох-дьаһах коммунальнай хаһаайыстыбатын уонна энергетика миниистирэ: “Өймөкөөн улууһугар оттук кэмэ саҕаланна. Абыйга эмиэ саҕаланна. Дьиэлэри куурдаары оттук кэмин иннинэ холбуурга сайаапкалар киирбиттэрэ. Бу балаһыанньаҕа итиини биэрэ тэрилтэлэр утары бардылар”.

Онон Саха сиригэр кыстыкка киирии түһүмэҕинэн ыытыллар. Күн бүгүн болдьохтон хаалыы бэлиэтэммэт. Маныаха күн-дьыл даҕаны билигин сылаас турар, онон коммунальщиктар тымныылар түһүөхтэригэр диэри бары бэлэмниир үлэлэри түмүктүөхтэрэ.