Дьоппуон сэриитэ түмүктэммитэ 80 сыла

Кирилл Егорович Павлов төһө 99 хаарын санныгар ууллардар уопсастыба олоҕор  көхтөөх тэтимин ыһыктыбат. Бас-көс киһи санаата, этиитэ куруук учуоттанар. Кирилл Егорович Дьоппуон сэриитин кыттыылааҕа. Бу байыаннай кыргыһыы быйыл түмүктэммитэ 80 сыла. Оччолорго эдэркээн Кирилл Павлов Кыһыл Аармыйа иккис этэрээтигэр киирэн кыайыыны уһансыбыта.      

Кирилл Павлов, Аҕа дойду Улуу сэриитин кыттыылааҕа: "Улахан Квантунскай Армия утарсыыны күүскэ саҕалаабыта. Онон бастакы чаастарга өлүү баар этэ".

Саха байыаһын Кирилл Павлов этэрээтэ  Цикцикар диэн куорат туһаайыытынан өстөөҕү утары кыргыһыыга  баран истэҕинэ сэрии түмүктэммитэ. 

Кирилл Павлов, Аҕа дойду Улуу сэриитин кыттыылааҕа: "Билиэннэйдэри дьаһайарга диэн сорудах кэлбитэ. Ону биһиги кинилэри Сэбиэскэй Сойуус илиҥҥи куораттарын бэрэстэбиитэллэригэр туттартыыр этибит".

Иккис аан дойду сэриитин түмүктүүр киирсиилэргэ кыттыбыт Ытык бэтэрээн Кирилл Павлов бу күннэргэ эҕэрдэ бастыҥын тутар. Өрөспүүбүлүкэ салалтата болҕомто уурар, кытай норуота махталын ыытар.

“Кыһыл Аармыйа 1945 сыллахха балаҕан ыйын 2 күнүгэр бөдөҥ байыаннай атааннаһыы бүтэһиктээҕин тохтоппута. Бу кылгас, ол эрэн улахан суолталаах сэриигэ Саха сириттэн 3600 тахса киһи кыттыбыта. Балартан 2700 тахса байыас дойдутугар эргиллибитэ”, - Мария Дмитриева, корреспондент.

Дьоппуон сэриитигэр кыттыбыт биир дойдулаахтарбытын барыларын Саха түмэлин историктара  бу кыһыл кинигэҕэ түмэн үйэтиппиттэр.  Бу аан дойду историятыгар биир улахан кыргыһыы туһунан быыстапка музейга бастакытын арыллыа. Манна Дьоппуон сэриитин хаамыытын арылхайдык көрдөрөр карта киин сиргэ туруоҕа.

Айсен Павлов, Саха түмэлин история салаатын исписэлииһэ: "Бу картаҕа да көстөрүн курдук биһиги аармыйабыт арҕаа өттүттэн кэлбиттэрэ, уопуттаах байыаннайдар уонна Забайкалье фрона тэриллэр. Холбоһуктаах күүс Квантунскай Аармыйаны урусхаллааһыҥҥа кыттыыны ылаллар. Бу сэриибит төһө да кылгас буоллар хаан тохтуулаах. Ол курдук өлбүтүнэн 12 тыһыынчаттан тахса киһи буолар".

Оттон историяҕа улахан суолталаах сэрии түмүктэммит үбүлүөйдээх сылыгар бу ый устата араас тэрээһиннэр ыытыллыахтара.