Хотугулуу-Илиҥҥи федеральнай университекка ниэп уонна гаас идэтигэр үөрэтэр хос арылынна

Саҥа кабинекка бастакы аһаҕас уруок. "Сахатранснефтегаз" тэрилтэ үлэһиттэрэ бастакы уонна төрдүс куурус устудьуоннарыгар бэйэ хайысхаларын туһунан итиэннэ хас биирдии кабинекка баар тэрил туһунан кэпсииллэр. Саҥа үөрэнэр хоско устудьуон көрөн эрэ буолбакка, тутан-хабан үөрэнэригэр усулуобуйа олохтонно.

Егор Слободчиков, М.К. Аммосов аатынан ХИФУ инженернай техническай институтун итиинэн хааччыйыы кафедратын салайааччыта: "Бу кабинет устудьуон көрөн, тутан-хабан үөрэнэригэр аналлаах. Гаас ситимэ техническэй өттүнэн хайдах буолуохтааҕа толору көрдөрүллэр. Гаас дьиэҕэ киириэр диэри бары түһүмэҕэ көрдөрүллэр".

Инженернэй техническай институкка тыһыынчанан устудьуон үөрэнэр. Маныаха сыллата ордук элбэх туттарсааччы бу гаас уонна ниэп хайысхатыгар кэлэр. Оттон бүтэрбит ыччаттар улахан аҥаардара олохтоох тэрилтэлэргэ идэлэринэн үлэлии бараллар. Аҥаардас бу сылга тустаах институт 15 бүтэрээччитэ "Сахатранснефтегаз" хампаанньаҕа үлэҕэ киирбит.

Антон Томский, "Сахатранснефтегаз" тэрилтэ гаас ситимин тарҕатар салалтатын салайааччыта: "Биһиги тэрилтэбит тутаах үлэһиттэрэр бары бу факультеты бүтэрбиттэрэ. Онон биһиги баарбытын биллэрэн уонна устудьуоннарга үөрэнэллэригэр судургу буоллун диэн бу хоһу оҥордубут".

Ниэп уонна гаас салаатыгар  аныгы технологиялар тэтимнээхтик киирэллэр. Онон үрдүк үөрэхтээх, киэҥ билиилээх, бэйэ идэтигэр эҥкилэ суох быһаарсар каадырдары бэлэмнээн таһаарар үөрэх кыһатын эрэ буолбакка үлэ биэрээччи эмиэ биир сүрүн сыала буолар.

Владимир Заровняев, "Сахатранснефтегаз" тэрилтэ гаас ситимин салалтатын салайааччыта: "Устудуьоннарга күн бүгүн туттулла сылдьар оборуудабанньаны көрдөрөбүт. Бу бүтэрэн баран биһиэхэ үлэлии кэлэллэригэр олус туһалаах буолуо. Үлэ хаамыытыгар киирэллэрэ өссө түргэтиэ. Маны таһынан видео уруоктары бэлэхтээтибит".

Күн бүгүн өрөспүүбүлүкэбитигэр гаас уонна ниэп салаата балысханнык сайдар. Сүрүннээн хостонор сирдэр Бүлүү эҥээр бааллар. Биир улахан хостонор сирдэринэн Чайанда, Талакаан уонна Таас Үрэх буолаллар. Аҥаардас кэнники 5 сыл иһигэр хас да саҥа хостонор сирдэри арыйбыттара.

Максим Терещенко, СӨ бырамыысылыннас уонна геология миниистирэ: "Саха сирэ күн бүгүн ниэп уонна гаас хайысхатыгар бэһис миэстэҕэ сылдьар. “Сахатранснефтегаз” уонна “Газпром” тэрилтэ өҥөтүнэн социальнай гаастааһыҥҥа дойдуга сэттис миэстэҕэ сылдьабыт".

Онон саҥа идэтитиллибит үөрэнэр хос салгыы тустаах салааны үрдүк үөрэхтээх, киэҥ билиилээх каадырдарынан хааччыйыыга төһүү күүс буолуоҕа. Эдэр исписэлиистэр үлэ хаамыытыгар тутатына киирэргэ бэлэм буолуохтара.