Бастакы президент Михаил Николаев аатынан оскуола арылынна

Киин куорат үөрэнээччилэрэ быйылгы үөрэх дьылын саҥа оскуолаҕа көрүстүлэр. Үүнэр көлүөнэ сайдыытыгар, иитии-үөрэтии саҥа эйгэтин тэрийиигэ толору кыах биэрэр саҥа оскуола олоххо киирбититтэн төрөппүттэр, оҕолор үөрүүлэрэ муҥура суох.

Кристина Кочнева, төрөппүт: "Олус долгутуулаах. Биһиги улахан оҕобут 1 кылааска барда.  Оскуола аттыгар олоробут, онон манна кэллибит ".

Саҥа үөрэх кыһата 3 мэндиэмэннээх, 990 миэстэлээх, 17 тыһыынчаттан тахса кыбадыраатынай миэтэрэ иэннээх,  "Ыччат уонна оҕолор" национальной бырайыак чэрчитинэн тутуллан үлэҕэ киирдэ.

"Бастакы президент Михаил Николаев аатын сүгэр оскуола өрөспүүбүлүкэҕэ саамай улахан оскуола буолар. Манна хас этээс аайы анал лабораториялар, кылаастар бааллар. Оҕо дэгиттэр сайдыытыгар бары усулуобуйа тэриллибит", - Ирина Гольдерова, корреспондент.

Быйылгы үөрэх дьылыгар оскуола - 980 үөрэнээччилээх. Маҥнайгы кылааска 140-чэ оҕо киирдэ. Оҕолор манна икки тылынан,  сахалыы уонна нууччалыы, биир симиэнэҕэ үөрэниэхтэрэ.

Татьяна Федотова, М.Е. Николаев аатынан 40-с №-дээх орто оскуолатын дириэктэри үөрэх чааһыгар солбуйааччы: "Эбиэт кэннэ куруоһуоктар ыытыллыахтара. Араас хайысхалаах куруһуоктар, секциялар оскуола иһигэр ыытыллыахтара".

Оҕо билиҥҥи кэмҥэ киэҥ билиилээх, бары өттүнэн сайдыылаах буоларын ситиһэргэ сөптөөх усулуобуйаны тэрийиини, киэҥ билиилээх ыччат дьону иитэн таһаарарга өрөспүүбүлүкэ салалтата инники күөҥҥэ тутар.

Айсен Николаев, СӨ Ил Дархана: "Өрөспүүбүлүкэ бастыҥ оскуолаларын түмэр ситим аата уларыйан билигин “Бастакы президент оскуолаларын ситимэ” диэн буолла. Онно уон иккис оскуоланан 40№-дээх оскуола киллэрдим. Эрэнэбин, бу курдук бэртээхэй оскуолаҕа оҕолор элбэх билиини ылыахатар диэн уонна Михаил ефимович баҕа санаатын курдук Саха сирин инники сайыннарар кыахтаах оҕолор бу оскуолаттан тахсыахтара".

Саҥа үөрэх дьылын көрсө Дьокуускай куоракка өссө биир саҥа оскуола үлэҕэ киирдэ. Ол курдук Саха политехническай лицей эбии дьиэтэ үөрэнээччилэргэ аанын тэлэччи арыйда.

Надежда Тимофеева, Саха политехничскай лицей дириэктэрэ: "Бу эбии тутууга 426 оҕо үөрэниэҕэ. 7-8 кылаастар раас хайысхаларынан арахсан үөрэниэхтэрэ. Ону таһынан билими чинчийии, анал идэҕэ уһуйуу баар буолуоҕа бу саҥа тутууга. Спорду сайыннарыыга уонна дойдуга бэриниилээх буолууга иитиигэ болҕомто өссө күүһүрүө".

Сылын аайы өрөспүүбүлүкэҕэ саҥа оскуолалар, оҕо уһуйаанын эбийиэктэрэ тутуллан үлэҕэ киирэ тураллар. Бу сыл бүтүүтэ өссө 4 үөрэх кыһата киирэрэ былааннанар.