Саха сирин бэтэринээрдэрэ саҥа тимир көлө күлүүһүн туттулар

Саҥа тиэхиньикэни биир бастакынан Ньурба улууһун бэтэринээрдэрэ туттулар. Тустаах салалта 80-ча үлэһиттээх. Өрөспүүбүлүкэҕэ биир улахан бэтэринээрдэр тэрилтэлэрэ буолар. Нэһилиэктэри кэрийэ сылдьан үлэлииргэ усулуобуйабыт тубуста диэн салайааччы кэпсиир.

Аркадий Гаврильев, Ньурба улууһугар бэтэринээринэйэ салалтатын салайааччыта: "Итинник массыынаны кэтэспиппит ыраатта. Онон үөрдүбүт аҕай. Нэһилиэктэрбит улуус кииниттэн ыраах бааллар. Онуоха көһө сылдьар лаборатория кэлбитэ үлэбитин күүһүрдүө диэн эрэл баар".

Тимир көлө анализтары тиэрдэр-таһар эрэ буолбатах. Бу көһө сылдьар лаборатория буолар. Эрдэ маннык тиэхиньикэнэн хааччыллыы суох этэ, бу Саха сиригэр бастакы мобильнай бэтэринээрийэ лабораториялара буолаллар.

Саргылаана Тополина, Мэҥэ Хаҥалас улууһугар бэтэринээринэйэ салалтатын салайааччыта: "Көрүллэр анализтарын барытын оҥоруохтарын сөп, иһигэр киирэннэр. Миэстэтигэр олорон эрэ түмүгүн быһаараллар. Ылыллыбыт пробаны харайар оборуудабанньа баар. Онон хаачыстыба өссө үрдүүр".

Оттон Дьокуускай куораттааҕы бэтэринээрийэ салалтата биир ураты тиэхиньикэни тутта. Бу бырысыаптаах инсинератор диэн. Кыыл-сүөл өлүгүн  суох оҥорор.

Артём Бурцев, Дьокуускай куоракка бэтэринээринэйэ салалтатын салайааччыта: "Саамай сүрүнэ туталыыр эйгэҕэ хоромньуну оҥорбокко эрэ өлүгү суох гынар".

Саҥа тиэхиньикэ күлүүһүн Мэҥэ Хаҥалас, Ньурба улуустарын, киин куорат уонна өрөспүүбүлүкэ бэтэринээрийэтин салалталара туттулар. Туһааннаах тимир көлөлөр Саха сирин бырабыытылыстыбатын өйөбүлүнэн ылылыннылар. Даҕатан эттэххэ, 2022 сыллаахха Ил Дархан Айсен Николаев сорудаҕынан  бэтэринээрийэ сулууспатын сайыннарыыга саҥа миэрэлэр ылыллыбыттара. Манна анаан сыллата саҥа тиэхиньикэнэн хааччыллыыга үбүлээһин көрүллэр.

Сергей Местников, СӨ бырабыытылыстыба бэрэссэдээтэлин солбуйааччы: "Бу иннинэ УАЗ “Фермерга” таҥыллыбыт лаборатория итиэннэ былырыын хотугу улуустарга бурааҥҥа уонна мотуордаах тыыга лабораториялар кэлбиттэрэ. Оттон быйыл ГАЗель олоҕор  таҥыллыбыт лаборатория 3 улууска түҥэтилиннэ".

Онон сыллата бэтэринээрдэргэ үлэлиир усулуобуйаларын тупсарарга саҥа тимир көлөлөр тиһигин быспакка кэлэ тураллар. Бу мантан кыыл-сүөл туруга итиэннэ аһыыр аһылыкпыт, тулалыыр эйгэбит быһаччы тутулуктаах.