Дьокуускай куоракка "Саҥа көрүү" диэн байыаннай-техническэй бэстибээл ыытыллынна

Бу курдук хас биирди бэстибээл кыттааччыта бэйэтин холонон көрдө. Бэстибээл Саха сиригэр аан бастакытын ыытыллар, Улуу Кыайыы 80 сылыгар ананар.

Манна барыта уонтан тахса хамаанда,  сэттэ көрүҥҥэ күөн көрүстэ.  Айсен Иванов бу бэстибээлгэ табаарыстарын кытта анаан-минээн кытта кэлбит. Кыттаачылар бары бэлэмнээхтэрин, күүстээх хамаандалар мустубуттарын этэр.

Айсен Иванов, кыттааччы: "Хамаандалар уочаратынан түһүмэхтэри ааһа сылдьаллар. Биһиги уочараппыт кэлэ илик, кыратык долгуйабыт. Ыччат министиэристибэтэ маннык тэрээһиннэри ыытара олус үчүчгэй".

Бу бэстибээлгэ анал байыаннай дьайыы кыттыылаахтара, бэтэрээннэр, устудьуоннар уонна патриотическай кулууп иитиллээчилэрэ кытыннылар. Ордук оскуола оҕолоро хас биирди маастар-кылаастары сэргээн барытыгар көхтөөх кыттыыны ыллылар.  

Павел Слободчиков, кыттааччы: "Биһиги хамаандабыт устудьуон уопсайдарын сэбиэтиттэн хомулунна. Хамаандабытыгар 8 киһи баар. Билиҥҥи туругунан маннык тэрээһин олус наадалаах".

Төрөөбүт дойдуга, норуокка тапталы үүнэр көлүөнэҕэ иҥэрии  дойду сүрүн соруга. Онон Саха сирин улуустарыгар, нэһилиэктэригэр итиэннэ киин куоракка дойдуга бэриниилээх буолуу тэрээһиннэрин элбэтиэхтэрэ.

Сарыада Дьол, бэстибээл тэрийээччитэ: "Тэрээһиммит сүрүн соругунан ыччаты түмүү уонна додйга бэриниилээх буолуу тыынын тилиннэрии буолар. Хамаандаларбыт олус бэлэмнээхтэр".

Инникитин тэрийээччилэр бу бэстибээли өссө кэҥэтэр, элбэх кыттаачыны түмэр санаалаахтар.