Нам улууһугар икки улахан эбийиэк тутуллар

Ил Дархан Айсен Николаев Нам улууһугар үлэлээтэ. Үлэ хаамыытынан тутулла турар саҥа балыыһаны көрдө. Манна үс салаа холбонон биир сиргэ үлэлиэхтээх.

Ариан Сергеев, Нам улууһун киин балыыһатын кылаабынай бырааһа: "Гинекология, терапия уонна хирургия салаалара сыһыарыллыахтара. Маны таһынан доруобуйаны чинчийиигэ аналлаах саҥа оборуудабанньалар кэлиэхтэрэ. Ол курдук УЗИ, рентген, эдоскопия аппараттара кэлиэхтэрэ".

Тутуу билигин 70% бэлэм. Күн бүгүн манна 80-тан тахса үлэһит үлэлиир, онон үлэ тэтимнээхтик бара турар. Тутуу үлэтэ түмүктэнэн, сыл бүтүүтэ киирэрэ былааннанар.

“Быйыл Нам улууһугар икки улахан эбийиэк тутуллан киириэҕэ. Ол курдук 450 миэстэлээх оскуола. Манна билигин тутуу 70% тиийдэ. Үлэ түүннэри-күнүстэри барар”.

Салгыы Айсен Николаев саҥа тутулла турар 450 миэстэлээх оскуоланы көрдө. Саҥа тутуу 6 тыһыынча кэриҥэ кв.м.иэннээх, 3 мэндиэмэннээх, "Үөрэҕэрии" национальнай бырайыак чэрчитинэн тутуллар. Оҕо үөрэнэригэр, сайдарыгар туох баар усулуобуйа барыта тэриллиэҕэ.

Наталья Никонова, Намнааҕы 2-с №-дээх орто оскуола дириэктэрэ: “Биһиги кэтэспиппит наһаа ыраатта. Оскуолабыт бэйтин историческай миэстэтигэр кэллэ. Манна урут кыра мас оскуолалаах этибит. Онтон биһиги наһаа үөрэбит”.

Ил Дархан Айсен Николаев улууска тутулла турар икки улахан эбийиэктэри көрөн,  тутуу үлэтин үрдүктүк сыаналаата.

Айсен Николаев, СӨ Ил Дархана: “Үлэ-хамнас үчүгэйдик бара турар. Билигин оборуудабанньа барыта атыылаһыллан кэллэ. Үлэ тэтимэ түргэн. Былаан быһыытынан Саҥа дьылга диэри үлэҕэ киириэ. Эрдэ оскуола турар сирин чинчийиигэ тардыллыы тахсан хойутааһын баар. Ол эрэн бу сыл бүтүөр диэри бүтэрэри бэдэрээччит этэр ”.

Түмүгэр Ил Дархан улуус баһылыктарын, дьокутааттарын кытта көрсөн сүбэ мунньах ыытта. Мунньахха сүрүннээн 33№-дээх федеральнай сокуоҥҥа уларыйыы киирэрин, инникитин туох үлэ ыытыллыахтааҕын торумнаатылар.