Дьокуускайдааҕы үүт собуотугар сыыры оҥоруу кэмэ саҕаланна
Туоннанан үүт. Бу мантан 100 киилэ сыыр оҥоһуллан тахсыахтаах. Үрүҥ илгэ хайаан да сайыҥҥы мэччирэҥ киэнэ буоллаҕына табыллар. Онон үүт бастыҥа эрэ барсар. Оттон Саха сирин ынаҕын үүтүттэн хайа баҕар сыыр тахсарын этэллэр.
Үүт собуотугар барыта 5 көрүҥ сыыр оҥоһуллар. Голландскай, российскай уонна сымнаҕас көрүҥнэр. Туох да эбиилик туһаныллыбат, аҥаардас үүт эрэ. Онон сыллата атырдьах ыйыгар, саамай сыыр сатанар кэмигэр, бу сыах арыллан үлэлиир.
Сыыры астааччы Константин Ишуткин этэринэн үүт астартан биир саамай уустуктара. Манна кыра да алҕаһы таһаардахха табыллыбат. Онон бигэргэммит халыыбы тутуһуу булгуччулаах. Маныаха лабараан идэлээх исписэлиистэр оҥоһуллар бородууксуйаны тута күүстээх хонтуруолга туталлар.
Туйаарыма Федорова, Дьокуускайдааҕы үүт собуотун лабараана: "ГОСТунан үлэлиибит биһиги, онон ирдэбилгэ сөп түбэһиэхтээх. Биһиги сүрүннээн үүт ас сиигин уонна кислотнаһын көрөбүт".
Суукка устата туустаах ууга сыппыт сыырдар салгыы куураллар. Манна мас долбуурдарга хас да күн устата хахтаныахтарыгар диэри сыталлар. Ууран баран умнан кээспэккин, күн аайы оҕолуу бүөбэйдээтэххэ эрэ хаайыстыбалаах үрүҥ аһы ылаҕын.
Константин Ишуткин, Дьокуускайдааҕы үүт собуотун сыыр астыыр маастаара: "Бу манна уурталаан баран, хас сарсыарда аайы эргитэлиибит, мас долбуурдарын уларытабыт. Сөптөөх хах үөскээбитин көрүөхпэр диэри манна тураллар".
Быйыл уопсайа 13 туоннаны оҥоруу былааннанар. Маныаха чугас эргин хаһаайыстабалартан үүтү туталлар.
Татьяна Васильева, Дьокуускайдааҕы үүт собуотун сырдатыы салаатын салайааччы: "Бөдөҥ үүт туттарааччыларбытынан буоаллар “Туймаада”, “Баҕарах” хаһаайыстыбалар. Бу 7 ыйга 2400 туоннаны туттардылар".
Онтон куурбут, анал хахтарга угуллубут сыыр аны 40 күн устата ситэр, ол эрэ кэннэ атыыга тахсар. Онон сотору кэминэн сайын сүмэтин барытын иҥэриммит олохтоох үрүҥ аһы амсайыахпыт.
