Саха сирин соҕуруу өттүгэр харахха эпэрээссийэни оҥоруу кэҥиир

Бу бэлиэ күн доруобуйа харыстабылын эйгэтигэр бэйэлэрин олохторун анаабыт, туруу үлэһиттэри чиэстээтилэр, наҕараадалары туттардылар, махтал тыллары эттилэр.

Светлана Аргунова харах бырааһынан үлэлээбитэ 15 сыл буолла. Кини кэнники кэмнэ медицинэ эйгэтэ сайдан, саҥа аныгы кэм ирдэбилигэр эппиэттиир анал аппараттар эбиллэн дьону эмтииргэ түргэн да чэпчэки буолла диэн этэр.

Светлана Аргунова, Өрөспүүбүлүкэтээҕи харах балыыһатын офтальмолог-хирург бырааһа: "Сайдан иһэбит диэххэ сөп. Харах ыйааһына 7 грамм эрэ. Ону чинчийиигэ наһаа элбэх үнүстүрүмүөн, оборуудабанньа наада. Бүһүгүҥҥү күҥҥэ элбэх ситиһиилээхпит. Оройуоннарынан сылдьан эмтиибит. Ону таһынан Россия атын да куораттарыгар тиийэн улахан эпэрээссийэлэри оҥоробут". 

Быйыл Өрөспүүбүлүкэтээҕи харах балыыһата үбүлүөйдээх 100 сылын бэлиэтиир. Балыыһа сайдан,  кэҥээн,  ситимнээх үлэни ыытар. Харах балыыһатын эмчиттэрэ куруук араас таһымнаах үөрэтиини ааһаллар, таһымнарын үрдэтэллэр.

Георгий Степанов, СӨ Бырабыыталыстыба бэрэссэдээтэлин солбуйааччы: "Офтальмолог быраастарбыт, хирургтарбыт Сахабыт сирин эрэ дьонун эмтээһининэн муҥурдаммакка, Магадантан Донецскай норуотунан өрөспүүбүлүкэҕэ тиийэ киэҥ хабааннаахтык үлэлииллэр. Улуустары, куораттары кытта сибээс улаатта. Эрдэттээн баэлэмнээн баран тахсаннар, элбэх киһини  өрүһүйэллэр". 

Харах балыыһатыгар сылга 10 тыһыынчаттан киһи сылдьан, эмтэнэн ааһар. Быраастар күннэтэ 70-ча эпэрээссийэ оҥороллор. Балыыһа инникитин өссө кэҥиир, сайдар былааннаах.

Иван Луцкан, Өрөспүүбүлүкэтээҕи харах балыыһатын кылаабынай бырааһа: "Инниктин салгыы сайдар, кэҥиир былааннаахпыт. Сотрру кэминэн Нерюнгри куоратыгар офтальмология киинин арыйыахпыт. Бу Саха сирин соҕуруу өттүгэр харахха эпэрээссийэ ахсаанын элбэтиигэ туһуланар". 

Харах балыыһата аныгы кэм ирдэбилинэн туттар ньыымаларын тупсаран, саҥа технологиялары баһылыыллар, онон харах ыарыытын эмтээһиҥҥэ тупсан, үрдүкү таһымҥа таҕыста.