Оскуолалар саҥа үөрэх дьылыгар бэлэмнэр

Ыраас-сырдык медиссиинэ хосторо Дьокуускай куорат 17 нүөмэрдээх оскуолатыгар баар буоллулар. Саҥа аныгы тэрил билиҥҥитэ суох эрээри, үөрэнээччилэргэ бастакы суһал медиссиинэ көмөтүн оҥорорго итиэннэ быраас үлэлииригэр сөптөөх усулуобуйа олохтоммут. Биир хоско  медкарталары харайаллар итиэннэ быраас оҕолору көрөр. Оттон иккис кабинет процедурнай.

Анатолий Чиряев, Дьокуускай куорат 17 №-дээх оскуолатын дириэктэрэ: “Оҕолор араас быһыылары ылаллар. Саҥа ирдэбилинэн  медик хосторун саҥардан биэрдибит бэйэбит күүспүтүнэн”.

Оскуолаларга медиссиинэ хосторун сөргүтэн үлэлэтии быйылгы үөрэх дьылыгар биир сүрүн уларыйыы. Маныаха бу 500 элбэх ахсааннаах үөрэнээччилээх оскуолаларга киирдэ. Онтон салгыы кыра үөрэх кыһаларыгар эмиэ медиссиинэ хосторун арыйар былаан баар.

Ньургун Павлов, СӨ үөрэх уонна наука миниистирин бастакы солбуйааччы: “Өрөспүүбүлүкэбит 96 оскуолатыгар медиссиинэ хосторо саҥардыллан үлэлиэхтэрэ.Бу биһиги өрөспүүбүлүкэбит уратыта буолар. Сорудаҕы Ил Дархан биэрбитэ”.

Даҕатан эттэххэ сыллата үөрэх хаачыстыбатын эрэ үрдэтиигэ буолбакка, оҕо оскуолаҕа иккис дьиэтин курдук сылдьарыгар усулуобуйа тупсар. Оскуолалар саҥардыллаллар, маны тэҥэ хас сыл ахсын саҥа баараҕай таас үөрэх кыһалара тутуллан үлэҕэ киирэллэр. Быйыл кэтэһиилээх эбийиэк, өрөспүүбүлүкэ үрдүнэн саамай улахан оскуола киин куоракка саҥа үөрэх дьылыгар аанын тэлэччи арыйыаҕа.

Галина Васильева, М.Е. Николаев аатынан Дьокуускай куорат 40 №-дээх оскуолатын дириэктэрэ: “Үчүгэй баҕайы эдэр төрөппүттэр, үчүгйэ баҕайы оҕолор. Улахан дьиэ кэргэн буолан эрэбит. Коллективпыт бастакы мунньаҕын ыыппыппыт, былааннарбытын торумнаабыппыт ”.

Бу саҥа оскуолаҕа тыһыынча кэриҥэ оҕо саҥа үөрэх дьылын саҕалыа. Оттон өрөспүүбүлүкэ үрдүнэн барыта 150 тыһыынча үөрэнээччи. Ол иһигэр 10 тыһыынчаттан тахса оҕо аан маҥнайгытын оскуола боруогун атыллыаҕа.

“Өрөспүүбүлүкэҕэ быйыл уопсайа 1291 оскуола саҥа үөрэх дьылыгар аанын тэлэччи арыйыа. Күн бүгүн улахан аҥаара үөрэнээччилэри көрсөргө бэлэм тураллар. Киин куоракка 19 оскуолаҕа быстах өрөмүөн үлэт ыытылынна. Маны таһынан икки оскуолаҕа оннуттан саҥардыы барда”, - Ирена Осипова, корреспондент.