Өлүөнэни туоруур муоста иккис атаҕын тутуохтаах коффердам оҥоруутугар киирдилэр

Тас өттүттэн көрдөххө улахан буочука, оттон ис өттүгэр муостаны тутууга киһи аймах саҥа айыыта. Маннык технология хаһан да ханна да туттулла илигэ. Бу муоста чааһа коффердам диэн ааттанар. Барыта чып курдук, 102 уһун турба кэчигирэһэн турар.

"Бастакы коффердам толору бэлэм буолла. Бу баараҕай тутуу 5 мэндиэмэннээх дьиэ үрдүктээх уонна 1270 туонна ыйааһыннаах. Бачча улахан тутууну уһуннаран илдьэн өрүс түһэҕэр түһэриэхтэрэ", - Мария Дмитриева

Итиэннэ ити турбалар устун  120 миэтэрэ усталаах тимир каркастары үүттээн киллэрэн баран, бетонунан кутуохтара. Оччоҕо Өлүөнэ хайа баҕар күүстээх сүүрүгүн, өрүс барыытын тулуйуохтаах.

Баараҕай кээмэйдээх тимир эркиннэри бэйэ бэйэлэригэр иһэрдэллэр. Маннык гынан улаатыннаран баран аттынааҕы былаһааккаҕа тиэйэллэр. Бу иккис киин тирэҕи тутуохтаах коффердам оҥоруутун саҕалаатылар.

Серик Исабеков, тутуу маастара:"Көстөрүн курдук,  23-с эркин иһэрдиллэ сылдьар. Номнуо 20 истиэнэни бүтэрдибит. Үлэ былаан быһыытынан баран иһэр".

Иккис коффердам кээмэйинэн бастакыттан икки төгүл улахан буолуохтаах. Онон сотору кэминэн үлэһит ахсаана биллэ эбиллиэ. Билигин икки кытылынан 170 киһи симиэнэнэн арахсан түүннэри-күннэри үлэлиир.

Михаил Акимов, "ВИС Строй" тэрилтэ оҥорон таһаарар техническэй салаатын салайааччыта: "Улахан коффердам, киин пилону тутуохтаах тирэх. Онон үлэтэ элбэх. 4 атахха тургутуу ыыттыбыт. Ону таһынан бу ый 30 күнүгэр 5 атахха тургутуохпут ".

Бу тирэхтэртэн  Өлүөнэ муостата саҕаланар. Сыбаайалар 26 миэтэрэ дириҥҥэ анньыллан сыталлар. Балар  күргэ төһө бөҕө уонна уйуктаах буоларын тургутуутун  ааһаллар. Тутааччылар этэллэринэн 4 миэтэрэни түстэххэ ирбэт тоҥ саҕаналар. Маны сэргэ өрүс анараа кытылыгар эмиэ үлэ тэтимнээхтик барар. 

Антон Крупнов, "ВИС Строй"  тэрилтэ тутуу үлэтин дириэктэрэ:"Уҥа кытылга муостаҕа киирии суолу кутан саҕалаатыбыт. Ону тэҕэ сыбаайаларга анаан арматура каркастарын иһэрдии саҕаланар. Итиэннэ бу күннэргэ уу түһэн өрүс сүнньүн уларытыыны сөргүттүбүт".

Оттон муостаны тутуу сылы эргиччи барар, улахан тымныылар түһүөхтэригэр диэри буурдааһын үлэтэ тохтообот.