Учуутал идэтин өйүүр саҥа бырагыраамалар үлэлиэхтэрэ

Учуутал тиийбэтин кыһалҕата сытыытык турар. Үөрэх министиэристибэтэ иһитиннэрэринэн сыллата үөрэх дьылын саҥатыгар 700-800 вакансия аһаҕас буолар. Маныаха үлэ дьаарбаҥката биир саамай суолталаах тэрээһин. Биир күн биир сиргэ бары улуус үөрэҕин салалтатыттан түмсэллэр. Онон үлэ көрдөнөөччүгэ да үлэһиккэ наадыйааччыга да тоҕоостоох.

Анастасия Пшенникова, үлэ көрдөнөөччү: "Мин Арктикатааҕы култуура уонна искусство институтун бүтэрбитим. 23 №-дээх оскуолаҕа социальнай пелагогунан үлэлээбитим. Хас да вакансия бэйэбэр көрүннүм, Хаҥалас уонна Өлүөхүмэ оройуоннарыгар". 

Исписэлиис тиийбэтин кыһалҕатын быһаарар сыаллаах араас миэрэлэр өрөспүүбүлүкэҕэ үлэлииллэр. Олортон саамай көдьүүстээхтэрэ "Земскэй учуутал", "Арктика учуутала" уонна хоту үлэлии барааччылары дьиэнэн хааччыйыы бырагыраамалара. Маны сэргэ быйылгыттан саҥа бырайыактар үлэлээн саҕалыахтара.

Степан Степанов, СӨ үөрэх уонна наука миниистирин солбуйааччы: "Университет былырыыҥҥыттан саҥа киллэрбит сүүрээнин, үрдүкү куурустары тута үлэҕэ киллэриэххэ диэн сүүрээнин, быйылгыттан “Үлэ” диэн ааттаах бырайыак быһыытынан киллэрэн эрэр. Ону таһынан биһиги министиэристибэбитигэр бу Үөрэҕи сайыннарыы институтун иһинэн каадыр киинэ аарыллыаҕа. Ол киини кытта ыкса үлэлиэхтэрэ".

Ону тэҥэ Атырдьах ыйынааҕы сүбэ мунньахха "Учитель тут" диэн үлэ көрдүүр сайт арылынна. Оскуоланы уонна учууталы сибээстиир, туһанарга табыгастаах платформа.   Хас биирдии улуус уонунан исписэлиискэ наадыйарын дьаарбаҥкаттан сиһилии билсиэххэ сөп. Манна киин, илин эҥээр, Бүлүү бөлөх эрэ буолбакка хотулартан элбэх бэрэстэбиитэл кэлбит.

Людмила Оконешникова, Анаабыр улууһун Сааскылаах орто оскуолатын бэрэстэбиитэлэ: "Биһиги оскуолабытыгар омук тылын учуутала уонна алын кылаас учуутала наадалар. Эрдэ техническэй предметтэргэ учуутал тиийбэт буолара. Билигин бэйэбит оҕолорбут үөрэхтэрин бүтэрэн дойдуларыгар төннөллөрүттэн үөрэбит эрэ".

Дойду үөрэҕирии министиэристибэтин сылыктааһынынан билигин баар учууталлар аҥаардара пенсияҕа бардахтарына, улахан кыһалҕа тириир. Ол инниттэн оскуолаҕа профориентационнай үлэни тэрийии сытыытык барыа итиэннэ улуустарга  педагогическай колледж салаалара арыллан саҕалаатылар. Күн бүгүн учуутал идэтигэр бэлэмниир үөрэх кыһата 5 улууска үлэлиир. Оттон 2030 диэри кырата 17 оройуоҥҥа колледж салаата баар буолуо.