Ил Дархан Айсен Николаев Сунтаар улууһугар үлэлээтэ

Сылын аайы ыччат туристическай сүлүөт өрөспүүбүлүкэ көхтөөх ыччатын биир сиргэ түмэр. Быйыл слет Сунтаар улууһугар ыытыллынна. Ил Дархан Айсен Николаев сүлүөт кыттааччыларын кытта көрсөн, ыччакка ситиһиилэри, саҥа бырайыактары олоххо киллэрэн иһэллэригэр баҕарда.

Бу тэрээһин кылгас кэм иһигэр улахан таһымнаах өрөспүүбүлүкэтээҕи хамсааһын буолла. Үс күн устата ыччаттар хамаанданан арахсан хас да көрүҥнэ күрэхтэстилэр. Уустук тургутуулары аастылар, бэйэлэрин кыахтарын, дьоҕурдарын көрдөрдүлэр.

Айсен Николаев, СӨ Ил Дархана: «Эдэр ыччат түмсэннэр, олох үчүчгэй баҕайы хамаандалар кэлэннэр куоталаһа сылдьалларыттан киһи көрө-көрө үөрэр, күүс-сэниэ ылар. Баҕарыам этэ эдэр ыччаппыт өссө да барытыгар итинник көхтөөхтүк кытыннын. Бу курдук куоталаһыылар түмэллэр».

Үлэ хаамыытынан Айсен Николаев улууска быйылгы оттооһун хампаанньатын  билистэ. Отчуттары кытта көрсөн, илэ-хоро кэпсэттэ.

Отчуттар бүтэһик сылаас күннэри баттаһа оттуур сирдэрин охсо киирбиттэр. Быйыл улууска оттооһун уустуктардаах буолла диэн этэллэр. Күн бүгүн былаан толоруута улууска 56% тиийбит. 

Айсен Николаев, СӨ Ил Дархана: «Дьон олох эрэллээх, бу халлаан туран биэрэр кэмигэр хаалыыны ситиэхпит диэн. От үүнүүтэ куһаҕана суох. Хомойуох иһин, элбэх ходуһа ууга сытар. Уу түһэр, онон дьон бары биир киһи курдук кыстыыр оппутун булуохпут диэн. Онон Махтаныам этэ, Сунтаар улууһагар бу курдук үлэ бара турар».

Салгыы Ил Дархан Айсен Николаев улуус саҥа үөрэх дьылыгар төһө бэлэмнээҕин билистэ. Улууска 1 №-дээх оскуолаҕа өрөмүөн үлэтэ хайдах барбытын сыаналаата. Маны таһынан саҥа тутулла турар лицейы көрдө. Билигин тутуу үлэтэ 65%  тиийбит.

450 миэстэлээх саҥа үөрэх кыһата «Үөрэҕэрии» национальнай бырайыак чэрчитинэн тутулла турар. Тутуу үлэтэ түмүктэнэн бу сыл бүтүүтэ киирэрэ былааннанар.