Сиилэс бэлэмэ саҕаланна

Комбайн сайын устата күҥҥэ сыламнаан үүммүт сиилэһи хомуйар. "Туймаада" хаһаайыстыба Нөмүгүтээҕи  салаатыгар  сүөһү эбии аһылыгын хомуурун үлэлэрэ ортолостулар. Улахан тимир көлөнү кытары, комбайн биир тэҥник үлэлииллэр.

"Бу бааһынаҕа уопсайа 419 гектар сиргэ ыһыллыбыта. Хомуур саҕаланна. Былаан быһыытынан балтараа нэдиэлэнэн үлэ түмүктэниэҕэ", - Анастасия Добрянцева.

Хомуур түмүгүн болдьоҕо ыгым. Сарсыардаттан киэһээҥҥи диэри чугас уонна ыраах бааһыналарга үлэлиирин улахан кыамталаах тимир көлө суоппара Василий Михайлов кэпсиир. Биир массыына күҥҥэ чугас эҥэр 10-тан тахса риэйси оҥорор.

Василий Михайлов, суоппар: "Массыынабар уонча туонна киирэр. Күҥҥэ 12-13 сырыы тахсар. Бу чугас сиргэ. Оттон ыраах 7 буолар".

Тустаах хаһаайыстыба 700 хороҕор муостааҕы тутар. Оттоммут оту кытары 2000 кэриҥэ туонна сиилэһинэн сылы тахсар. Маныаха бу көрүҥ эбии аһылыгынан эрэ муҥурдаммакка "Туймаадалар" өссө эбии эбиэс уонна подсолнух үүннэрбиттэр. Билигин сүрүн үлэ силээс бааһынатыгар барар.

Дмитрий Захаров, "Туймаада" хаһаайыстыба Нөмүгүтээҕи  салаатын салайааччыта: "110 гектары хомуйдубут. Икки дьааманы толоруохтаахпыт. Биир номнуо толордубут. Дьаамабыт 1000 туоннаны батарар".

Чахчы, тутатына хомуллубут сиилэһи дьаамаҕа илдьэллэр.  Манна 1000 туонна күөх маасса киирэр икки дьаамата баар.  Тимир көлө бырахпыт маассата кэнсиэрбэлэнэр уонна анал суурадаһын кутуллар.

Людмила Реева,  "Туймаада" хаһаайыстыба Нөмүгүтээҕи  салаатын агронома: "1100 туоннаны уктубут. Иккис дьаамабытыгар киирдибит. Былааммыт 2000 туонна".

Салгыы улахан тиэхиньикэнэн тэбистэрэн, кэнсиэрбэлэммит маассаны быйыл  анаан-минээн атыылаһыллыбыт 200 микроннаах пленканан бүрүйэллэр. 40 хонугунан сүөһү эбии аһылыга бэлэм буолан, хороҕор муостаахтарга биэриэххэ сөп буолар. Манна даҕатан эттэххэ, өрөспүүбүлүкэ үрдүнэн 24 тыһыынча туонна сиилэс бэлэмнэниллиэхтээх.