"Самаан" сибэкки ферматыгар

Фермер Татьяна Охлопкова сарсыардата сибиэһэй сибэккини быһыыттан саҕаланар. Эгэлгэ араас чэчиктэн кини букет хомуйар. Сибэкки дьөрбөтүн таҥар бэйэтэ эмиэ туспа кистэлэҥнээх эбит.

Татьяна Охлопкова, "Самаан" сибэкки ферматын хаһаайката: "Сарсыарда олох эрдэ эбэтэр киэһэ күн санньыйбытын кэннэ хомуйабын. Итиигэ уута көтөн хаалбыт буолар, ол иһин күнүс быстахпына 2-3 чаас ууга туруоран баран букет хомуйабын".

Кырдьык да, сибэкки дьөрбөтүн хомуйар диэн бэйэтэ туспа искусство. Сибэкки феята Татьяна хас биирдии букекка сэдэх, ураты үүнээйилэри эбэн биэрэр. Оннооҕор бөх-сыыс курдук көрөр үүнээйибит композицияны түөрэ-лаҥкы уларытыан сөп. Саҥа ураты тыыны эбэн биэрэр.

Татьяна Охлопкова, "Самаан" сибэкки ферматын хаһаайката: "Букеты хас да көрүҥ сибэккилэртэн хомуйабын. Эрээт эрээт таһаартыыбын. Дьон кинигэ курдук аахтын диэммин".

Татьяна Охлопкова бэйэтэ химик үөрэхтээх, уһуйааччы, доцент. Онон кини үүнээйини сиэмэттэн саҕалаан олордору, көрүү-харайыы ымпыгын-чымпыгын үчүгэйдик билэр. Маны тэҥэ кини куруук билиитин таһымын үрдэттэр. Араас дойду сибэкки үүннэрээччилэрин кытта сибээс тутар, кинилэртэн үөрэнэр. Онон бу дууһатынан талбыт идэтэ буолар. Хас сыл ахсын саҥаттан саҥа суорт үүнээйини олордор. Манна оннооҕор сэдэх томат баар.

Татьяна Охлопкова, "Самаан" сибэкки ферматын хаһаайката: "Бу кыра теплица иһигэр 80 эрэ батар. Сороҕо таһырдьа үүнэр. Араас көрүҥ барыта баар. Улахан томаттар бааллар. Былырыын 700 гр. Тиийэ сылдьыбыта биир ас".

"Самаан" сибэкки фермата 4 сылын үлэлиир. Ранинкулус диэн сибэккиттэн саҕаламмыт дьоҕус фермаҕа билигин 50 тахса араас үүнээйи баар. Маныаха үгүстэрэ Саха сиригэр эрдэ ким да үүннэрбэтэх сибэккилэрэ. Билигин фермаҕа сибэккини хомуйуу кэмэ. Онон олохтоохтор бэйэ дойдубут буоругар үүммүт кэрэ чэчиктэри ылан чугас дьонноругар бэлэх уунуохтарын сөп.