Өймөкөөн улууһугар ардах халаанын иккис долгуна салҕанар
Дьэ кууруох буолан испит дьиэлэргэ иккистээн уу киирдэ. Халаан уута Өймөкөөн нэһилиэктэригэр эмиэ ыксаллаах быһыыны үөскэтэр. Индигиир өрүс таһыма кэнники 3 күҥҥэ тахса турар. Инньэ гынан тэлгэһэлэр, дьиэлэр хаттаан ууга бардылар.
Оттон бу Тамара Васильева Өймөкөөн нэһилиэгин олохтооҕун дьиэтэ. Тамара Егоровна тымныы полюһугар туризмы сайыннарбыт киһиннэн биллэр. Кини билигин ууттан куотан оҕолоругар кэлэн олорор. Дьиэтигэр уу иккистээн киирэн барар кыаҕа суох.
Тамара Васильева, Өймөкөөн нэһилиэгин олохтооҕо: "Күһүн да чугаһаата. Төһө кыалларынан кыһыҥҥа диэри баттаһыахпыт дии санаабыппыт даҕаны билигин даҕаны кутталлаах. Бөһүөлэк барыта эмиэ ууга баран турар. Үүт Уурбуттан анараа бөһүөлэккэ биэрэк диэкки олорооччулар дьиэбитигэр барар кыахпыт суох. Мин дьиэбэр уу бэҕэһээҥҥиттэн улаханнык иккистээн киирбитэ".
Ууга барбыт дьиэлээхтэр ыалларынан көстүлэр. Чөлүгэр түһэрии үлэлэрэ ууттан сылтаан тохтоото. Суол-иис суох. Кутуу суол баар сиринэн билигин мотуордаах тыынан сылдьаллар.
Александр Оконешников, Өймөкөөн улууһун баһылыга: "Сүөһүлэри үрдү сиргэ таһаардыбыт. Нэһилиэнньэ аһынан, уматыгынан хааччыллан олорор. Бу уу бастакы курдук улахан хоромньуну оҥорбото буоллар. Өймөкөөн нэһилиэгэр икки дьиэ тутуллуохтаах. Бэдэрээччиттэрэ кэлбиттэрэ, бу халаан ааһарын кэтэһэн матырыйаалларын сүөкээбэккэ тураллар".
Өймөкөөн нэһилиэгэ икки учаастактаах - Хара Тумул уонна Биэрэк Үрдэ. Хара Тумулга уу эмиэ досуннук киирэр. Өймөкөөнү кытта сибээстиир биир соҕотох суол быстыбытын көрөбүт.
Иккиситээн кэлбит уу үгүс хоромньуну оччуттарга аҕалла. Олохтоохтор кээһиилээх отторун былдьаттылар, охсуллубут отторо эмиэ хаалла. Ууну кэһэ сылдьан отторун үрдүк сиргэ таһаараллар.
Билигин Ыксаллаах быһыы-майгы министирэистибэтин быыһааччылара итиэннэ нэһилиэнньэ олоҕор куттал суох буолуутун хааччыйар министирэристибэ анал бөлөҕө үлэлиир.
Анатолий Алексеев, СӨ айылҕа харыстабылын миниистирин солбуйааччы: "Муниципальнай суолу икки сиринэн суурайан турар.".
Уу иккистээн эбиллэн чөлүгэр түһэрии болдьоҕо сыҕарыйар. Онон Индигиир эбэ таһыма түстэ эрэ кыстыкка диэри үгүс үлэ күүтэр.
