Анал байыаннай дьайыыга саа-саадах хомуйуута салҕанар

Астан-таҥастан саҕалаан, малга-салга тиийэ. Саха сириттэн өссө биир фура анал байыаннай дьайыыга айаннаары гуманитарнай көмөнү тиэнэр. Общественник Майя Галактионовна Аргунова бу анал байыаннай дьайыыга сылдьар эр дьоҥҥо көмөнү хомуйар түмсүүгэ баар. Манна өрөспүүбүлүкэ бары улуустарыттан бэрэстэбиитэллэр бааллар . Кинилэр сырыы аайы таһаҕас ыыталлар.

Майя Аргунова, Дьокуускай куорат олохтооҕо: "Сиринэн, сөмөлүөтүнэн көмөнү ыыта турабыт. Уолаттары кытта сибээстээхпит. 11 биригээдэ,  “Шатун” диэн батальон, 64 биригээдэ уолаттарыгар көмөлөһөбүт".

Бу рейсинэн тустаах түмсүү ордук ас-таҥас хомуйан ыытта. Байыастары кытта куруук сибээскэ баар буоланнар кинилэр тугу сакаастыылларынан төһө кыалларынан ыыта сатыыллар. Ордук ас-үөл, таҥас-сап уонна эмп-том ыыталлар.

“Байыастарга саамай көмөлөөх тимир көлө буолар. Бу сырыыга гуманитарнай көмөнү сэргэ 4 тиэхиньикэни ыытан эрэллэр. Бу Амма Чапчылҕан, “Сахатранснефтегаз” тэрилтэ уонна чааһынай сирэй тиэхиньикэнэн хааччыйдылар”, - Ирена Осипова, корреспондент.

Чаас иһигэр Саха сирин хас да улууһуттан, тэрилтэлэртэн, чааһынай сирэйдэртэн, урбаанньыттартан араас гуманитарнай көмө хомуллан кэллэ. Туһаныллар малы тэҥэ, өссө байыастар санааларын көтөҕө,ис туруктарын бөҕөргөтө диэн Ньурба улууһун дьаһалтата сэргэ оҥотторон ыытан эрэр. Бу анал байыаннай дьайыыга сылдьар биир дойдулаахтарбыт сакаастара эбит.

Анна Винокурова, Кыайыыга бары бииргэ !" өрөспүүбүлүкэтээҕи суһал ыстаап координационнай киинин салайааччытын солбуйааччыта: "4 туонна гуманитарнай көмө, 4 тиэхиньикэ. Көмөнү тиэйэн иһэр массыына аара Алдаҥҥа уонна Нерюнгрига тохтоон ааһар, онтон эмиэ көмө тиэнэр".

Маны тэҥэ бу күннэргэ Росгвардия нөҥүө анал байыаннай дьайыыга сааны-саадаҕы нэһилиэнньэттэн хомуйан ыытан саҕалаатылар. Олохтоохтор бэйэ баҕа өттүнэн кэлэн сэрии толоонугар сылдьар биир дойдулаахтарыгар сааны-саадаҕы ыыталлар. Икки күн иһигэр 30 тахса саа туттарылынна.

Василий Афанасьев, ыҥырыллар аата "Хаҥыл": "5 Армия иһинэн биһиги бу саалары чаастарга, полкаларга илдьиэхпитин сөп. Онтон атын армия буоллаҕына биһиги, хомойуох иһин, биһиги сатаан тиксэрбэппит. Холобур, 12 калибрдаах диэн сааны тутабыт. Тоҕо диэтэххэ атын калтбрдаахтарга ботуруон суох. 1,2 уостаах, аптамаат саалары барытын тутабыт". 

Онон билигин байыастарга гуманитарнай көмөнү таһынан сааны-саадаҕы эмиэ ыытыахха сөп. Сааны Росгвардия лицензияны көҥүлү биэрэр отделыгар, Дзержинского 35 нүөмэрдээх дьиэтигэр кэлэн туттарыахха сөп. Икки нэдиэлэ устата хомуйаллар. Оттон гуманитарнай көмөнү хас ый аайы ыыталлар.