Өймөкөөҥҥө от балаһыанньата уустук

Өймөкөөҥҥө уу иннин биэрэр чинчитэ суох. Бастакы халаан кэннэ, билигин эмиэ тохтоло суох ардахтан уу эбиллэ турар. Бырааттыы Винокуровтар ходуһаларыгар Куораҥныырга  ууну кэһэ сылдьан эрэ оттонор. Инники сылларга манна кубус кураанах буолара.  Олохтоохтор бэйэ кыаҕынан хоруу хорон, ууну түһэрэн, кыстык оту булунарга түбүгүрэллэр.

Ходуһаҕа тиийии бэйэтэ эмиэ биир уустук дьыала. Халааҥҥа суол-иис алдьанан, бу курдук вездеходтарынан эрэ тиийэллэр. Хаһаайыстыбаларын тутан хаалар сыалтан ууну кэһэ сылдьан оттуурга күһэллэллэр. 

Тамара Винокурова, Өймөкөөн нэһилиэгин олохтооҕо: “Балаһыанньабыт сүрдээх уустук. Ардах кэлэн үлэни атахтыыр. Мин иһиттэхпинэ сорох ыал сүөһүлэрин аччатар, оннооҕор эһэр да санаалаахтар. Быйыл биһиги 7-8 сүөһүнү кыстатар былааннаахпыт”.

Отто Хара Тумул ходуһатыгар Габышевтар дьиэ кэргэн кээспиттэрин кэннэ уу киирэн, хара көлөһүннэрэ халааҥҥа былдьанна. Бу кыһалҕатыттан дьон күннээҕи отторун утары куулга хаалаан дьиэ аттыгар куоттарар.

Өймөкөөн нэһилиэктэрин оттонор ходуһалара бары да бу курдук туруктаахтар. Улуус сыллааҕы былаана манна 3360 туонна этэ, ону халаан мэһэйдээн 1490  туоннаны бэлэмниири сылыктыыллар. Күн бүгүн мантан 385 туонна оттонно.

Сахаяна Павлова, СӨ тыа хаһаайыстыбатын уонна ас-үөл бэлиитикэтин миниистирин солбуйааччы: "Өймөкөөн улууһугар от боппуруоһа сүрдээх кытаанах. Ону таһынан атын хоту улуустарга эмиэ итинник кыһалҕа турар. Өймөкөөн улууһугар сылыктааһын быһыытынан былаантан 41% оттонуохтаах. Ол эрэн дьыл бүтүөр диэри бу ыйыллар кээмэйтэн таһаара сатыахпыт. Манна мобильнай биригээдэ боппуруоһа эмиэ турар". 

Мобильнай биригээдэлэр күүстэринэн быйыл оту өрөспүүбүлүкэ ис өттүгэр толору бэлэмниир сорук турар. Оттон Өймөкөөн улууһугар окко устудьуоннар көмөҕө кэллилэр. Барыта 13 ыччаты Томтор, Сордоҥноох уонна Үчүгэй нэһилиэктэринэн араартаатылар. Кинилэр бу ый бүтүөр диэри олохтоохторго көмөлөһүөхтэрэ.