"Боотур" 30-с этэрээтин анал байыаннай дьайыыга атаардылар

Саха хорсун уолаттарын, анал байыаннай дьайыыга атаараллар. Байыастар анал байыаннай дьайыыга дойдуларын чиэһин көмүскүү бараары икки ый кэриҥэ бэлэмнэммиттэрэ. Тустаах тургутар үөрэххэ эр дьону бастакы суһал медицинскэй көмөнү оҥорорго, сааны-саадаҕы хайдах туһанарга уонна да атын ньыымаларга үөрэттилэр.

Иннокентий Лазарев, "Воин" киин салайааччыта: "Дьарыктара наар биир кэм ааһар. Барыларын биир тэҥник, кими да чорбоппокко, эрчийэбит. Аннараа туттуллар ньымалары барытын үөрэтэн ыытабыт. Сүрүннээн бэйэлэрин тыыннарын көмүскэнэргэ. Уопсайынан түөрт хайысханан үөрэтэбит".

Бу күн 20 байыаһы атаардылар. Кинилэри аймахтара, доҕотторо көрсө кэлбиттэр. "Моряк" диэн позывнойдаах "Боотур" бу күннэргэ дойдутугар этэҥҥэ эргиллэн уоппускатыгар кэллэ, табаарыстарын атаара, сүбэ-ама биэрэ кэлбит.

"Моряк", "Боотур" 24-с этэрээт байыаһа: "Бары бойобуой соруктары толорон этэҥҥэ кэллибит. Аҥаарбыт уһатаннар, илии баттааннар салгыы хааллылар. Билигин уоппускаҕа сылдьаллар. Икки нэдиэлэгэ төптөрү бараннар сулууспаларын салгыахтара. Этэҥҥэ эргилинниннэр".

Хас биирдии манна турар байыас күүстээх-хорсун санаалаах,  бэйэтэ  ааспыт суоллаах-иистээх,  кинилэри биир күүс сомоҕолуур - төрөөбүт дойдуга таптал.

Пётр Шамаев,СӨ ыччат уонна социальнай коммуникация миниистирэ: "Этэҥҥэ туох да сүтүгэ суох эргиллэн кэлэллэрин, доруобуйаларын харыстанныннар, бэйэ бэйэлэрин өйөһө сырыттыннар, барар сирдэрэ ыарахан. Бэйэлэрэ талан бараллар, ону биһиги убаастыыбыт эрэ уонна эрэнэ кэтэһэбит".

Бу Саха сириттэн барар 30-с этэрээт буолар. Батальон өрөспүүбүлүкэттэн бу иннинэ көппүт "Боотур" этэрээккэ сыһыарыллыаҕа. Байыастар аны алта ыйынан дойдуларыгар этэҥҥэ эргиллэн кэлиэхтэрэ.