Арктика улуустарыгар авиация уматыгын тиэйии түмүктэнэр

Өлүөнэтээҕи өрүс борохуоттарын тэрилтэтин биир саамай баараҕай танкера ыраах айаҥҥа турунар. Суудунаны урууллуур мотористар уу аалын хас биирдии чааһын көрөллөр-истэллэр. Ханна туох итэҕэс-быһаҕас баарын оҥороллор. Бу борокуот Арктика икки ыраах улууһугар ниэп бородуктатын тиэрдиэхтээх.

Владимир Иустинов, "Туймаада-нефть" тэрилтэ уматык тиэрдэр салаатын салайааччыта: "Бу саамай улахан танкерга 2400 туоннаны кута турабыт. Онтон 200 туоннана Жиганскайдааҕы нефтебазаҕа барда, 220 туонна Аллараа Халымаҕа. Бу өрөспүүбүлүкэ авиатордарын уматыга буолар".

Билигин бу улахан танкердар Арктика улуустарыгар авиацияҕа анаан уматыгы тиэйэ сылдьаллар. Эдьигээн уонна Аллараа Халыма улуустарын кэннэ "Лена 20-30" диэн өссө биир баараҕай суудуна Индигиир өрүс сүнньүнэн сытар оройуоннарга уматыгы тиэрдиэҕэ.

Николай Виленко, Өлүөнэтээҕи өрүс борохуоттарын тэрилтэтин уматык тиэрдэр салаатын салайааччыта: "Манан авиация уматыгын тиэйиитин түмүктүүбүт. Маны сэргэ Өлүөхүмэҕэ  уматык тиэллэр. Мантан Тиксиигэ, Черскэйгэ барыаҕа. Сангаарга газоконденсат баар, ону икки нэдиэлэнэн Булуҥҥа уонна Анаабырга тиэйиэхпит".

Арктикатааҕы навигация баара-суоҕа 73 эрэ суукка. Бу маннык быстах кэм иһигэр уу ааллара тустаах улуустарга олоҕу-дьаһаҕы хааччыйар бары наадалаах малы-салы, бородууктаны, уматыгы тиэрдиэхтээхтэр. Бу навигацияҕа Арктика эҥэр 326 тыһ. тахса туонна таһаҕас тиэрдиллиэхтээх.

Никита Павлов, СӨ нэһилиэнньэ олоҕор-дьаһаҕар куттал суох буолуутун хааччыйыы миниистирин солбуйааччы: “Арктика өрүстэригэр борокуоттар сырыыларыгар уу бэртээхэй. Былырыыҥҥы сылы кытта тэҥнээтэххэ кыра хаалыы баар. Ону ситиһэргэ сөптөөх соруктары биэрдибит”.

Күн бүгүн 160 тыһ. туонна таһаҕас тиэрдилиннэ. Онон былаан аҥаара буолан эрэр. Билигин өрүстэргэ гидрологическай балаһыанньа этэҥҥэ, онон күнү-дьылы баттаһа суудуналар тэтими ыһыктыбакка үлэлииллэр.