Өрөспүүбүлүкэ чемпионатыгар бастыҥ охчуттары сүүмэрдээтилэр

"Туймаада" стадиоҥҥа сытыы харахтаах бэргэн ытааччылар бастыыр иһин киирсэллэр. Олимпийскай эрэллэри бэлэмниир училище иитиллээччитэ Алиса Кириллина бастакы улахан күрэхтэһиитэ. Кини иккис сылын оҕунан ытыынан утумнаахтык дьарыктанар.

Алиса Кириллина, күрэхтэһии кыттааччыта: "Киинэҕэ көрөммүн бу спорт көрүҥүн интэриэһиргээбитим. Ол иһин дьарыкка киирбитим уонна сөбүлээбитим. Эраҥҥа көрөрбөр чэпчэки курдук этэ, онтум ымпыга-чымпыга элбэх эбит".

Алиса Кириллина эдэр охчут киинэҕэ көрбүт ыра санаатын ситиспит эбит буоллаҕына, аҕам саастаах ытааччы Егор Николаевич Данилов чэпчэки атлетика көрүҥүттэн кэлбит. Номнуо 40 тахса сыл дьарыктанар уонна 60 сааһыгар маастар нуорматын толорбут. Билигин номнуо баай уопуттаах, бэргэн охчут.

Егор Данилов, күрэхтэһии кыттааччыта: "Билигин улахан дьарык суох. Кырдьыгынан баран эттэххэ, урукку дьарыгым тобоҕунан сылдьабын. Күрэхтэһиилэр чугаһаатахтарына 2-3 нэдиэлэ инниттэн хамсаммытынан барабын. Саас ылан иһэр быһылаах, ыарыҕатар буолбуппун".

Бу өрөспүүбүлүкэ чемпионатыгар 2001 сыллаах төрүөхтэн үөһээ саастаахтар кытталлар. Маныаха кыттааччылар бары бастакы спортивнай разрядтаахтар. Ол эбэтэр, манна алҕас баҕа өттүнэн кэлбит киһи диэн суох. Бары күүстээх сүүмэрдээһини ааспыттар кытталлар.

Александр Андреев, күрэхтэһии суудьуйата: "Өрөспүүбүлүкэҕэ кыттар 68 кыттаааччы барыта 15 улуустан кэллилэр. Кинилэр бастаан улуустарын иһигэр кыттан кыайбаттар манна кэлэллэр.  ".

Оттон бу күрэхтэһиигэ бастаабыттар инникитин өрөспүүбүлүкэ сүүмэрдиир хамаандатыгар киирэр кыаҕы ылаллар. Күн бүгүн Саха сирин чиэһин 60 тахса охчут көмүскүүр. Билигин бас-көс ытааччылар аан дойду таһымнаах күрэхтэһиигэ кыттарга бэлэмнэнэр дьарыкка сылдьаллар.

Михаил Филатов, СӨ оҕунан ытыыга сүүмэрдэммит хамаандатын сүрүн тренерэ: "Бу аҕыйах хонугунан Канадаҕа первенство мира буолуохтаах. Онно Лабашев али уонна Тараярова Мария Россия сүүмэрдэммит хамаандатын састаабыгар киирэннэр барыахтаахтар".

Саха сирин күүстээх охчуттара "Туймаада" стадиоҥҥа 3 күн устата кииристилэр. 4 дистанцияҕа, эр дьоҥҥо уонна дьахталларга кыайыылаахтар билиннилэр. Салгыы өрөспүүбүлүкэ чиэһин улахан күрэхтэһиилэргэ көмүскүүр кыаҕы ыллылар.