ХИФУ ботническай саадыгар быыстапка-дьаарбаҥка

Нам улууһун олохтооҕо Розалия Иванова анаан-минээн ботаническай саадка үүнээйи атыылааһа кэлбит. "Сылын аайы үгэс быһыытынан тэлгэһэбэр араас үүнээйилэри ылан, элбэтэн иһэбин. Быйыл атыыга сарбынньах, моонньоҕон элбэх эбит. Лилия диэн сибэккини атыыластым. Уруккуттан үүннэрэр баҕалаахпын",- Розалия Иванова, Нам улууһун олохтооҕо диэн этэр.

Билигин ботаническай саад нэһилиэнньэҕэ анаан декоративнай сэдэх үүнээйилэри тарҕатар сыаллаах быыстапка-дьаарбаҥка тэрийдэ. Дьон-сэргэ манна отонноох мастартан саҕалаан, соҕуруу дойду сэдэх сибэккилэрин  ылыан сөп.

Александра Ермолаева, М.К.Аммосов аатынан ХИФУ ботаническай саадын декоративнай үүнээйилэри үөрэтэр салаатын салайааччыта:"Азия лилиялара сибэккилии турар кэмэ буолан, дьон ордук бу көрүҥ сибэккини ылаллар. Ону сэргэ саас эрдэ сибэккилиир сибэккилэртэн пиону, адониһы ылаллар, баҕа батаһын арааһыттан атыылаһаллар".

Ботаническай саад декоративнай үүнээйилэр учаастактара сүрүн болҕомтону куруук ылар. Үлэтигэр бэриниилээх, эдэр агроном Людмила Кралина  сылын аайы үүнээйи көрүҥнэрин элбэтэн иһэр. Күн бүгүн ботаническай саадка 500тэн тахса араас күөх үүнээйилэр үүнэллэр.

Людмила Кралина, М.К.Аммосов аатынан ХИФУ ботаническай саадын агронома: "Дьон кэлэн күүлэйдиир, астыналлар. Манна мин саамай сүрүн үүнээйим шалфей буолар. Бастаан лаванданы баҕарбытым, онтум биһиэхэ итинник хойуутук сибэккилээбэт. Ол иһин атыннык толкуйдааммын шалфей диэн буолта".

Ботаническай саад үүнээйилэри чинчийэн үөрэтэрин таһынан, дьоҥҥо-сэргэҕэ сырдатар-үөрэтэр үлэни эмиэ ыытар. Манна араас интэриэһинэй маастар-кылаастар, семинардар, быыстапкалар куруук ыытылаллар.

Александра Ермолаева, М.К.Аммосов аатынан ХИФУ ботаническай саадын декоративнай үүнээйилэри үөрэтэр салаатын салайааччыта: "Саас бастаан хаппырыас исбэккилиэҕиттэн нэдиэлэ аайы тэрээһин оҥоробут. Холобур, хаппрыас субуотата, онтон дьаабылыка сибэккитэ тылыннаҕына, онтон сирень субуотата".

Хотугулуу-Илиҥҥи федеральнай университет ботаническай саада аны биир сылынан үбүлүөйдээх 25 сылын бэлиэтиир. Үбүлүөйдээх сылга научнай конференциялар, кинигэ сүрэхтэниитэ уонна да атын тэрээһииннэр ыытыллыахтара.