Дьокуускайга "Күөх чэппиэр" аахсыйа ыытылынна

Толору мөһөөччүк бөх-сыыс. Ойуур хаһаайыстыбатын эдэр исписэлииһэ Капитон Колосов субуотунньукка биир бастакынан тахсыбыт. Оҕо эрдэҕиттэн айылҕаҕа сыһыаннаах наукалары сэҥээрэн, бу хайысхаҕа инники идэтин талбыт. Бу аахсыйаҕа эрэ буолбакка, уопсайынан үлэ да быһыытынан куруук ойууру көрө-истэ сылдьар.

Капитон Колосов, Дьокуускайдааҕы ойуур хаһаайыстыбатын үлэһитэ: «Бу экологическай аахсыйа “Зеленый четверг” диэн. Бөх-сыыс хомуйабыт, мас олордуохпутун сөп, ууну да ыраастыахпытын сөп. Айылҕаҕа таҕыстахха бөх хаалларыа суохтаахтар».

Күөх чэппиэр аахсыйа быйылгыттан саҕалаан ыытыллар. Манна экологияҕа сыһыаннаах бары тэрээһиннэр киирэллэр. Онтон саамай сүрүнэ бу экология эбийиэктэрин бөхтөн-сыыстан ыраастааһын буолар. Аахсыйаҕа экологтар эрэ буолбакка бары баҕалаах киһи кыттыһыан сөп.

Владислав Велигура, СӨ айылҕа харыстабылын министиэристибэтин экологическай сырдатыыга департаменын салайааччытын солбуйааччыта: «Основная цель — это рассказать о своих экологических, хоть и небольших, победах в соцсетях по хештегу #ЗеленыйЧетверг. Можно рассказать о том, что вы делаете каждый четверг для охраны окружающей среды, для природы и вообще для экологии в целом».

Маныаха экологтар бэлиэтииллэринэн кэнники сылларга дьон айылҕаҕа сыһыана биллэ уларыйбыт. Аҥардас бу аахсыйаҕа да үгүс киһи кыттыспыта ону туоһулуур.

Раиса Колодезникова, Дьокуускайдааҕы айылҕа харыстабылын судаарыстыбаннай кэмитиэтин аҕа инспиэктэрэ: «Маннык аахсыйалар улуус аайы ыытылыннылар. Билиҥҥи кэмҥэ 25 улуус номнуо олорор нэһилиэктэрин бөҕүн хомуйдулар. Кэнники сылларга кэтээн көрдөххө дьон айылҕаҕа сыһыана уларыйда диэххэ сөп. Субуотунньукка тахсар дьон элбээтилэр. Бу аахсыйа арааһынай буолуон сөп».

Тустаах аахсыйа алтынньы ый бүтүөр диэри ыытыллар. Баҕалаах дьон хас чэппиэр аайы түмсүөхтэрэ.