Дьокуускай куорат саамай сырыылаах уулуссата өрөмүөннэнэр

Өрүс кумаҕа, онтон ПГС диэн ааттанар гравий булкаастаах дьапталҕаны куталлар. Ол икки ардыгар бу курдук гео полотно диэн матырыйаалы уураллар. Оччоҕо бэйэ бэйэтин кытта булкуспат, суол хотойуута кыччыыр. Бу түһүмэхтэр аспаал суол хаачыстыбатыгар быһаччы тутулуктаахтар. Онон хас биирдии хамсаныы барыта күүстээх хонтуруолунан ыытыллар.  

Александр Алексеев, "РИК Автодор" тэрилтэ суол учаастагын салайааччыта: «Аллараа дьапталҕатын кута сылдьабыт. Уонна сарсын номнуо хайыр таас кутуохпут уонна ол үрдүнэн аспаал ууруллар. Сабыытын балаһаларынан оҥоробут».

Сэбиэскэй Аармыйа 50 сыла уулуссаҕа хаһан да маннык улахан өрөмүөн  ыытылла илигэ. Саҥардылыннаҕына кэҥээн, 4 балаһалыаныаҕа. Ону тэҥэ гаас, кирдээх уу ситимнэрэ уларыйыахтара. Онон үлэ кээмэйэ улахан, 3 сыл устата салҕаныаҕа. Быйыл 400 миэтэрэ усталаах суолу оҥорор сорук турар. Бабушкинаттан Курнатовского уулуссаҕа диэри аспааллыахтара.

Ол курдук аспаал 3 дьапталҕалаах буолуоҕа. Бу суолу биллэ кытаатынныарыаҕа диэн исписэлиистэр этэллэр. Холобур, Дьокуускай иһинээҕи суолларга 2 сулуойу уураллар.

Оттон киин куоракка быйыл барыта 11 сиргэ хапытаалынай өрөмүөн барар. Күн бүгүҥҥү туругунан сыллааҕы сорук 65 бырыһыаҥҥа тиийбит. Бэс, от ыйдарыгар сүрүннээн инженернэй ситими оҥоруу барбыт эбит буоллаҕына, бу ыйга аспааллааһын күүскэ ыытыллыа. Сайсары муостата ааһар уулуссата номнуо аспаалламмыт, салгыы иккис кэрчиккэ билигин үлэ барар. 

Григорий Новгородов, "Главстрой" тэрилтэ суол тутуутун салаатын салайааччытын солбуйааччы: «Хаҥас өттүгэр үлэлии сылдьабыт, суолбутун бэлэмнии сылдьабыт. Онтон ураты, тротуарбытын, уоппутун тэҥҥэ оҥоро сылдьабыт».

2025 сылга Саха сиригэр суол өрөмүөнүн үлэтигэр бүтүн 2 млрд солкуобайтан тахса харчы  көрүллүннэ.