Экология хайысхатыгар грантовай күрэххэ Саха сириттэн 6 бырайыак кыайыыны ситистэ

Аллен көрүҥ чубукуну, Өлүөнэ-Өлөөн дьиикэй табатын уонна үрүҥ эһэни кэтээн көрүү бырайыактар кыайыыны ситистилэр. Оттон  бу  өрөспүүбүлүкэтээҕи биологичекай ресурсалар, ураты харыстанар айылҕалаах сирдэр уонна аан айылгылар дирекциятын бырайыактара буолар. Онон үгүс киһи билбэт Алдан хайаларын чубукуларын уонна Өлөөн диэки баар дьиикэй табалары чинчийии-үөрэтии барыаҕа.

Иннокентий Слепцов, СӨ биологическай ресурсалар, ураты харыстанар айылҕалаах сирдэр уонна аан айылгылар дирекциятын булт салаатын салайааччыта: «Соҕуруу хайаларга чубуку баар диэтэххэ дьон билбэт. Бу көрүҥү бүтэһик чинчийиитэ 1984 сыллаахха ыытыллыбыта, үйэ аҥара ааспыт. Билигин улахан үлэ кэтэһэр. Иккис бырайыакпыт – кыыл таба. Лено-оленекскай популяция диэн. Саха сиригэр саамай улахан популяция. Аҕыйах ахсааннаах норуоттарга улахан суолталаах. Спутник нөҥүө табалары кэтээн көрүөхтээхпит хамсааһыннарын».

Маны таһынан Аллараа Халыма диэки уутуйан үөскүүр үрүҥ эһэлэри үөрэтии бырайыага кыайыыны ситистэ. Манна Курдигино-Крестовая уонна Чайгурино диэн ураты харыстанар сирдэргэ баар Арктика мааныылаах кыылын чинчийиэхтэрэ. Бу сыалга 1,2 мөл. үп-харчы көрүлүннэ.

Саргылана Михайлова, СӨ биологическай ресурсалар, ураты харыстанар айылҕалаах сирдэр уонна аан айылгылар дирекциятын салайааччытын солбуйааччы: «Үрүҥ эһэни кэтээн көрөн-манаан, фотоловушка туруоруохпут диэн ол бырайыакка киирсибиппит».

Бу 3 улахан бырайыак олоххо киирэригэр уопсайа 16 мөлүйүөн солкуобай үп көрүлүннэ, маныаха куонкурус усулуобуйатынан дирекция бэйэтэ эмиэ эбии харчы көрөр.

Дойду Президенин граана биир үксүн наука, култуура, үөрэҕирии өттүгэр буолар эбит буоллаҕына, быйыл  экология хайысхатыгар көрүллэн, биһиги өрөспүүбүлүкэбит улахан ситиһиилэннэ.