Өрөспүүбүлүкэ үрдүнэн олохтоохтору үлэнэн хааччыйыы тыын боппуруос

Нэһилиэнньэ дьарыктаах буолуутун киинигэр дьон күннэтэ тохтобула суох кэлэр. Үлэ көрдөнөөччү ахсаана аҕыйаҕа суох. Аҥардас сыл саҕаланыаҕыттан Дьокуусккай куоракка 3 тыһыынчаттан тахса кэриҥэ киһи кэлэн үлэ көрдөнөрүн туһунан иһитиннэрбит. Итинтэн аҥара номнуо үлэ миэстэтин булбут. 

Мария Слепцова, Дьокуускайдааҕы нэһилиэнньэ дьарыктаах буолуутун киинин салайааччы: «1200 тахса киһи учуокка турар, онтон 726 киһитэ үлэтэ суоҕунан ааҕыллар. Дьокуускай куораты ылан көрөр буоллахпытына 711 киһи уонна 15 киһи Жатайга олорор дьон буолаллар. Былырыын баччаларга 641 киһи үлэтэ суоҕунан учуокка турар эбит. Билиҥҥи түгэнинэн 13% элбээтэ».

Өрөспүүбүлүкэҕэ нэһилиэнньэ дьарыктаах буоларыгар туһуламмыт анал бырагыраамалар, бырайыактар үлэлииллэр. Быйыл дьарыктах буолуу киинэ эбии үөрэхтээһиҥҥэ күүскэ ылсан үлэлэстэ. Ол курдук киин  100-тэн тахса киһини кылгас болдьохтоох анал куурустарга үөрэттэрдэ.

Мария Слепцова, Дьокуускайдааҕы нэһилиэнньэ дьарыктаах буолуутун киинин салайааччы: «Көһөн барар буоллахтарына, кинилэргэ эмиэ өйөбүл баар буолар. Ол курдук, хас биирдии киһи проеһын уонна олорор дьиэтин үс ыйдааҕытын, быстах кэмҥэ үлэҕэ киирэр буоллахтарына эмиэ төлүүбүт. Онтон бу бэйэтин дьиэ кэргэнин кытта көһөн барар буоллаҕына, киниэхэ 5 туоннаҕа дылы тырааныспар оросхуодун төлүүбүт».

Ыччаты үлэнэн хааччыйыыга сүрүн болҕомто ууруллар. Былырыын киин куоракка ыччат каадырын киинэ үлэтин саҕалаабыта. Киин үөрэх кыһатын, үлэни биэрээччини, устудьуону ситимниир суолталаах. Кини эдэр уопута суох исписэлиис үөрэнэ сылдьан үлэ булунарыгар көмөлөһөр. Киини кытта хас даҕаны бөдөҥ тэрилтэ сөбүлэҥ түһэрсэн үлэлэһэр, маны таһынан атын регионнарга эмиэ үлэ булуннулар.

Айтал Керемясов, СӨ нэһилиэнньэ дьарыктаах буолуутун киинин салайааччытын солбуйааччыта: «Күн-бүгүн ыччат каадыр киинэ 15 тыһ. тахса ыччаты хабан үлэлээтэ. Кинилэргэ 9 ый устата сүрдээх элбэх тэрээһиннэри ыыттыбыт. Ыччат кэлэр, үлэҕэ наадыйар».

Оттон үлэ миэстэтин ахсаанын ылар эбит буоллахха, бүгүҥҥү күҥҥэ өрөспүүбүлүкэ үрдүнэн уопсайа 9 тыһыынчаттан тахса үлэ миэстэтэ баар. Сүрүннээн вакансия промышленнай тэрилтэлэргэ уонна рабочай идэлэргэ элбэх.