Дьокуускайга бөх-сыыс ыраастыыр тэрилтэ үлэтэ сайыҥҥы кэмҥэ икки бүк элбиир

6 сылын бэриниилээхтик киин куорат уонна таһынааҕы нэһилиэктэр бөхтөрүн-сыыстарын ыраастыыр, суоппар идэлээх Тимофей Сметанин сменатыгар таҕыста. Кини хомуйар оройуоннара ДСК, Звезднай уонна Прометей түөлбэлэрэ буолаллар. Үлэбин сөбүлүүбүн, ол эрэн биллэн туран ыарахаттар бааллар диэн санаатын үллэстэр.

Тимофей Сметанин, "Якутскэкосети" тэрилтэ суоппара: «Санитарнай туочуканы бүөлээн кэбиһэллэр, онтон сылтаан киһи кыайан киирэн ылбат. Үлэбит элбэх баҕайы, иккистээн төннөн кэлэн ылбаппыт».

Билигин киин куорат устун  икки сменанан хайдыһан киэһээ 22:30 чааска диэри үлэ күөстүү оргуйар. Уопсайа 1460 санитарнай туочука, ол эбэтэр 5600-тан тахса баах хомуллар.

Сайыҥҥы кэмҥэ үлэ тутуу бөҕүн быраҕыытыттан, маныаха улахан кээмэйдээх мал-сал хаалларыллан, үлэ бытаарар диэн үлэһиттэр этэллэр. Итиэннэ сорох суобаһа суох дьон, оннооҕор тэрилтэлэр бөхтөрүн онно-манна быраҕалларын хомуйаллар.

Николай Ильинов, "Якутскэкосети" тэрилтэ салайааччытын солбуйааччы: «Сайын бөх элбэх буолааччы, тоҕо диэтэргэ даача кэмэ саҕаланар, өрөмүөннэнэллэр, саҥа миэбэл ылаллар».

Киин куорат күннэтэ улаатан-кэҥээн иһэр, ону кытары тэҥҥэ бөх-сыыс элбиир. Саҥа санитарнай туочукалар арыллаллар. Тимир көлө элэйэр. Онон тустаах тэрилтэ өссө эбии саҥа улахан кыамталаах тиэхиникэни кэтэһэр.

Иннокентий Пестерев, "Якутскэкосети" тэрилтэ логистикаҕа салаатын сүрүннүүр исписэлииһэ: «Сыл бүтэһигэр 9 саҥа эбии тиэхиникэ кэтэһэбит. 13 тиэхиникэ баахтары кытта габариттары тэҥҥэ хомуйаллар».

Сыл саҕаланыаҕыттан тустаах тэрилтэ 400 тыһ. тахса кууб бөх тиэйдэ. Хомуллубут бөх-сыыс Бүлүүлүүр аартык полигонугар тиийэр.