Дьокуускай куоракка Смарт-поликлиника тутуута түмүктэнэн эрэр

Саҥа тутуу түмүктүүр түһүмэххэ чугаһатта. Ис өттүгэр үлэ күөстүү оргуйар. Манна барыта 200-тэн тахса үлэһит, хас да бөлөҕүнэн арахсан түүннэри-күнүстэри үлэлиир.

Тутуу "Доруобуйа" национальнай бырайыак чэрчитинэн тутулла турар. Алта мэндиэмэннээх, тоҕус тыһыынча кэриҥэ кв.м. иэннээх. Саҥа поликлиника бырайыага - үгүс киһи тэҥҥэ көрдөрүнэ кэлэрин учуоттаан оҥоһуллубут.

Алексей Николаев, инженер: «Бу эбийиэк күҥҥэ 600 киһини ылыахтаах. Смарт-поликлиника диэн буолар. Тутуу бэлэмэ 90% үөһээ сылдьар. 210 киһи эбийиэккэ үлэлии сылдьар. Билиҥҥи туругунан инженернай ситимҥэ үлэ бара турар уонна таһынааҕы үлэҕэ».

Поликлиникаҕа сүрүн болҕомто уоту-күөһү таһынан сүрүн күүс уочараты наардыыр биир кэлим ситими таҥыыга, интернеты тардыыга, куттал суох буолуутун хааччыйар тэриллэри холбуурга ууруллар.

Гаврил Максимов, тутуу сүрүн инженерэ: «Манна аныгы баһаарынай ситим баар. Баһаар буоллаҕына көрдөрөр уонна бэйэтэ сэрэтэр».

Бу тутуу судаарыстыбаннай-чааһынай бииргэ үлэлэһии бырайыагынан тутуллар, онон бэдэрээттээх тэрилтэ оборуудабанньанан, миэбэлинэн толору хааччыйар. Саҥа оборудованиялар номнуо кэлэн, таҥыы үлэтэ бара турар.

Андрей Суслов, "ВИС" хампаанньа генеральнай дириэктэрэ: «Медицинское оборудование, несмотря на санкции, доставлено. Оно все здесь, в Якутске. Сейчас привезли на место установки КТ. Подрядная организация производит монтаж. Кроме того, рентген-аппараты устанавливаются».

Маны таһынан балыыһа туһунан бэйэтэ чинчийэр лабораториялаах буолуоҕа. Хас да салаалаах, аныгы кэм ирдэбилигэр эппиэттиир киин куорат биир улахан медиссиинэ киинин быһыытынан үлэлиэҕэ. Тутуу түмүктэнэн, бу сыл балаҕан ыйын бүтүүтэ киирэрэ былааннанар.