"Полярные авиалинии" хампаанньа көтөр аалын кэккэтэ хаҥаата

Үөрүүлээх быһыыга-майгыга Ми-8 МТВ-1 бөртөлүөттэн халлаан күөх бүрүөһүнү түһэрэн, көтөр аалы сүрэхтээһин саҕаланар. "Полярные авиалинии" хампаанньа Казаньааҕы бөртөлүөт собуотуттан 2 Ми-8 көтүтэн аҕалла. Көтүү этэҥҥэ ааһан саҥа тиэхиникэ Маҕан аэропордун булбута.

Евгений Слепцов, "Полярные авиалинии" акционернай хампаанньа материальнай - техническай салаатын салайааччыта: «Өссө икки бөртөлүөт ыллыбыт лизинганнан 15 сылга. 2017 сылтан 7-ис бөртөлүөппүт буолар. Арассыыйатааҕы бырагыраамаҕа киирэн лизингаҕа олоробут. Ол иһин өрөспүүбүлүкэбитигэр уонна Уһук Илиҥҥэ улахан бөртөлүөт пааркалаах хампаанньа буолабыт».

Чахчы күн бүгүн тустаах хампаанньа билигин 20-тэн тахса бөртөлүөт ааллаах. Бу тиэхиникэ барыта биһиги нэлэмэн, олус улахан өрөспүүбүлүкэбит устун дьону тиэйэр-таһар. Ыксаллаах быһыыга-майгыга үлэлиир, ыарыһах дьону илдьэр-аҕалар. Хоту улуустары киини кытары ситимниир.

Үгэс быһыытынан саҥа тиэхиникэни Дьокуускайдааҕы епархия сүрэхтиир. Архиепископ Роман бу күн алгыс тылларын этэн, сибитиэй уунан икки бөртөлүөтү алҕаата, этэҥҥэ көтүүлэри баҕарда. Саҥа Ми-8 Саха сиригэр авиация төрүттэммитэ 100 сылыгар ананан кэлбит курдук буолла. Онон биир үйэлээх история кэрэһиттэрэ буолар сыаллаах ааттаннылар.

Дмитрий Садовников, СӨ бырабыытылыстыбатын бэрэссэдээтэлин бастакы солбуйааччы: «Аҕыйах ахсааннаах бөртөлүөттэргэ тиксэрбитигэр дойду үрдүнэн. Маннык тиэхиникэ оборуоннай сакааска бара турар. Ол үрдүнэн биһиги таба туттан маннык ситиһиилэнэн. Маннык улахан өрөспүүбүлүкэбитигэр сөмөлүөтэ, бөртөлүөтэ суох олорбоппут, ол иһин үөрүүлээх түгэн».

Ми-8 бөртөлүөттэр биһиги тыйыс усулуобуйалаах айылҕабытыгар бэйэлэрин үчүгэйдик көрдөрбүттэр. Хайалар быыстарынан үчүгэй эргиирдэри, маневрдары оҥороллор. Томороон тымныыны тулуйаллар диэн авиацияҕа өр сыл үлэлээбит үлэһиттэр санааларын үллэстэллэр. Номнуо үгүс элбэх киһини быыһаабыттар. Онно бөртөлүөт ылы-чып сөп түбэһэр.

Саҥа тиэхинкэ хампаанньа инженернай-авиационнай сулууспатын исписэлиистэринэн толору бэрэбиэрэкэни ааспыттара. 12 чаас устата Казань куораттан Саха сиригэр диэри Сергей Дурнов уонна Павел Аммосов бөртөлүөттэри этэҥҥэ көтүтэн аҕалбыттара.