Дьокуускайга Туймаада стадиоҥҥа Физкультурник күнүн бэлиэтээтилэр

Дыгынчыктар оонньуулара ордук элбэх кыттааччыны уонна ыалдьааччылары түмтэ. Кырачаан уолаттар саха дэгит көрүҥнэригэр бэйэлэрин холоноллор. Күрэскэ мас тардыһыы, сүүрүү, хапсаҕай уонна тааһы көтөҕүү баар. Манна 6 саастарыттан саҕалаан кырачаан спортсменнар илин-кэлин түһүстүлэр. Үөһээ Бүлүүттэн сылдьар Саввиновтар спорду өрө туппут дьиэ кэргэн. Бу күрэскэ кинилэр икки уолаттара кытта сылдьаллар.

Платон Саввинов, Үөһээ Бүлүү олохтооҕо, тустуу тренерэ: «Дьиэ кэргэммитинэн бэлэмнэнэн кэлбиппит. Араас үчүгэй баҕайы күрэхтэһиилэр, спорт бырааһынньыга буоллаҕа».

Оттон элбэх кырачаан уолаттар бу түһүлгэҕэ мустубуттара саха төрүт көрүҥнэрэ үүнэн эрэр көлүөнэҕэ сайдыытын көрдөрөр. Күн бүгүн оҕо спортивнай оскуолаларыгар сүүһүнэн уолаттар бу спорт көрүҥнэринэн сөбүлээн дьарыктаналлар. Маныаха биллэр-көстөр спортсменнар бэйэлэрэ секция арыйан кырачааннары эрчийэллэр.

Леонид Филиппов, 2020 сыллаах "Дыгын оонньууларын" кыайыылааҕа, саха дэгит көрүҥнэригэр тренер: «Биһи спорт оскуолабытыгар 80-тан тахса оҕо сылдьар. Саалабыт кыра буолан баппаппыт. Ол иһин быйылгыттан кыракый куонкурус оҥороору гынабыт, кыахтаах, талааннаах оҕолору талан».

Улахан спорт түһүлгэтигэр үгүс спорду таптааччы, чөл олоҕу өрө тутааччы муһунна. Манна күрэхтэһиилэртэн саҕалаан оннооҕор бэйэ доруобуйатын көрүнүүгэ тиийэ араас тэрээһиннэр ыытыллаллар. Оҕо спордун оскуолаларга миэстэтигэр олорон эрэ баҕалаахтары араас секцияларга, кружоктарга суруйаллар. Аны туран сэдэх экспонаттардаах быыстапкалар турдулар. Оттон дьону ордук араас маастар-кылаастар сэҥээртилэр

Бу курдук хас биирдии кэлбит киһи бэйэ кыаҕын араас спорт көрүҥэр холонон көрдө. Үгүстэргэ инниктин ханнык көрүҥү талан дьарыктанарга бу маастар-кылаастар көмө буоллулар. Оттон маннык киэҥ далааһыннаах тэрээһин спордунан дьарыктанааччы, чөл олоҕу өрө тутааччы дьон элбээбиттэрин көрдөрдө. Бу күн тыһыынчанан киһи Туймаада стадиоҥҥа этин-хаанын чэбдигирдэн барда.