Саҥа "Спортивнай" кыбаарталларга тутуу тэтимнээхтик барар

Аата да этэринии "Спортивнай" түөлбэҕэ элбэх хайысхалаах успуорт уораҕайа тутуутуттан Кирилл Бычков оробуочай сырытта 17 кыбаарталга саҕаланна. Тутуу тиэмпэттэн хаалыыта суох диэн тутааччылар үлэ хаамыытын сэгэтэн кэпсээтилэр.

Салгыы иккис эбийиэк "Жилье" национальнай бырайыак чэрчитинэн уонна хаарбах туруктаах дьиэттэн көһөрүү бырагырааматынан тутулла турар элбэх кыбартыыралаах дьиэ тутуллуутун көрүү буолла. Сотору кэминэн 200-тан тахса ыал бу саҥа дьиэҕэ 2 сылынан көһөн киириэхтэрэ.

Бүгүҥҥү күн туругунан бу кыбаартал 6 дьиэтиттэн дьону көһөрдүлэр. 26 сөбүлэҥ түһэрсиллэн, 12 дьиэ кэргэн кыбартыыра ылар, 12 ыал харчынан ылаллара билиннэ. Эбийиэк 11 этээстээх 240 кыбарытыыралаах буолуоҕа.

17 түөлбэҕэ өссө биир баарҕай эбийиэк тутуута бара турар. Аҕам саастахтарбыт уонна доруобуйаларын туругунан хааччахтаах дьоммутун олордор интернат- дьиэҕэ билигин үлэ күргүөмнээҕэ бара турар.

Аверкий Потапов, тутуу прорааба: «Уопсайа 3619 куб.м. бетонтан билиҥҥи туругунан 2722 кубу ылан турабыт. Болдьохпутун тутуһаммыт үлэлии сылдьабыт. Быйылгы былааммытынан дьиэ сүрүн каркаһын ону таһынан хоруобуйатын оҥорор былааннаахпыт».

Бу кэнниттэн оробуочай хамыыһыыйа бүтэһик тутулла турар эбийиэккэ - оҕо уһуйааныгар сырытта. Бу оҕо саада сыл бүтүүтэ үлэҕэ киириэхтээх онон билигин манна көдьүүстээх үлэ иһигэр бара турар. Манна 240 оҕо биирдэ батан сылдьыаҕа.

Игорь Фёдоров, тутар тэрилтэ салайааччыта: «Кэрийии түмүгүнэн Кирилл Евгеньевич үчүгэйдик сыаналаата. Болдьохтон хаалааһын суох, кыратык ситии баар. Эбийиэккэ 60-ча киһи үлэлии сылдьар. Үлэ барыта тэҥҥэ бара турар».

Саҥа Спортивнай түөлбэҕэ ыытылла турар үлэлэри бырабыытылыстыба бэрэссэдээтэлэ Кирилл Бычков үчүгэйинэн сыаналаата уонна бэйэтин сорудахтарын биэрдэ.

Кирилл Бычков, СӨ бырабыыталыстыбатын бэрэссэдээтэлэ: «Задачи, которые у нас стоят, в том числе по нацпроектам и по переселению из ветхого аварийного жилья. Отдельно хочу отметить, что этот квартал будет полностью обеспечен всей необходимой инфраструктурой: образовательной, детской, спортивной».

Бу курдук Дьокуускай куораппыт 17 кыбаартала киэркэйэн, тупсан, саҥа эбийэктэр дьэндэтиллэн эрэллэр. 2030 сылга диэри Спортивнай түөлбэ куораппыт эмиэ биир ураты сиринэн буолуоҕа.