Куорат, тыа сирин эйгэтин тупсарыы

Сахалыы ураты тыыннаах саҥа паарка сотору кэминэн киин куоракка баар буолуоҕа. Аҕа дойду сэриитин дьоруойдарын аатынан түөлбэ олохтооҕо Александра Егоровна Андросова бу ытык сир сынньалаҥ паарката туруохтах сирин бу эҥэр олохтоохтор уруккуттан көрө-истэ сылдьабыт диир.

Александра Андросова, Дьокуускай куорат олохтооҕо: «2021 сылга Афанасий Семёнович Фёдоров маннык “Күнү көрсүү” диэн бырайыактаах этэ. Биһи наһаа сөбүлүү истибиппит. Биһи түөлбэлэннэхпитинэ сахалыы тыыннаах наһаа үчүгэй паарка буолуо эбит диэн өйдөбүлгэ кэлбиппит».

Онтон дьэ макеты туппутунан көҕүлүүр бөлөх тэриллэн федеральнай гран куонкуруһугар кыайан паарка олоххо киирэр чинчилэммитэ. Үбүлээһин көрүллэн үлэ саҕаламмыт. Бырайыагы "База 14" архитектура бюротун эдэр исписэлиистэрэ ылсан оҥорбуттар.

Анастасия Мамина, "База 14" архитектура бюротун бырайыактары салайар салаатын исписэлииһэ: «Манна кыра оҕоттон саҕалаан саастаах дьоҥҥ тиийэ аналлаах. Детскай, спортивнай былаһааккалардаах буолар».

"База 14" архитектура бюрота номнуо 10-с сылын Саха сирин араас муннугар үгүс эбийиэктэр бырайыактарын оҥорор. Уратылара диэн, кинилэр хас биирдии бырайыактара сахалыы тыыннаах. Үгэс буолбут элеменнэри аныгылыы тииптээхтик оҥороллор. Бу сахалыы оһуор эрэ буолбатах, холобура дойдубут уратытын көрдөрөр араас моһуоннаах оҥоһуктар. Кинилэр үлэлэрэ куорат уулуссаларын таһыгар турар мас сахалыы ыскамыайкалартан саҕаламмыта.

Мария Скрябина, "База 14" архитектура бюротун дириэктэрэ: «Элбэх үлэни оҥордубут. Билигин улахан эбийиэктэринэн дьарыктанабыт. Кэнники Квартал труда, ол иннинэ Парк будущих поколений бырайыактарын оҥорбуппут. Билигин биир филиалбыт Казахстааҥҥа баар, онно оскуола бырайыагын оҥоро сылдьабыт».

Архитектура бюрота билигин да тэтимин ыһыктыбакка куорат, тыа сирин эйгэтин тупсарыыга туһуламмыт бары куонкурустарга кыттан олорор сирбит кэрэ, ураты көстүүлээх буоларыгар кыһаллар. Бу паркалары эрэ буолбакка бүтүн баараҕай эбийиэктэр бырайыактарын оҥорон олоххо киллэрэллэр.