Дьокуускай куорат суолларыгар 11 эбийиэги оннуттан көннөрүүгэ үлэ барар

Хабаров уулууссатыгар атырдьах ыйын 4 күнүттэн 8 чыыһылатыгар диэри Ленин проспегыттан Суорун Омолллон суол силбэһиитигэр учаастак сабыллан турар. Манна суол өрөмүөннэнэн турар аҥарыгар иккис хос аспаал уурбуттара. Үлэ бу сааскыттан тиһигин быспакка бара турар.  

Мичил Пестерев, суол маастара: «Билигин биир балаһаны арыйа сылдьабыт».

Хабаров уулуссатыгар Ярославскайтан Богатырев уулуссатыгар диэри 1,4 км кэриҥэ уһуннаах кэрчик суол капитальнай өрөмүөннэр. Хабаров уулуссатын өрөмүөнүн РИК Автодор тэрилтэ сүрүннүүр.

Александр Алексеев, "РИК Автодор" тэрилтэ суол учаастагын салайааччыта: «Бүгүҥҥү күнүнэн аллаарааҥҥы аспаал араҥатын бүрүллүүтэ түмүктэннэ, кыра үлэлэр хааллылар. Билигин уот тардааһына уонна уу ыытар лотоктары оҥорор хаалла».

Бу Хабаров уулуссатыгар баараҕай өрөмүөн үлэтэ түһүмэхтэринэн 2027 сылга диэри тардыллыаҕа. Быйыл Чиряев аатынан уулуссаҕа диэри учаастагы бүтэрэр соруктаахтар. Быйыл куорат үрдүнэн 11 суолу өрөмүөннүөхтэрэ, уопсайа 15 км саҥардыллыаҕа. Ол иһигэр Ойуунускай аатынан уулусса эмиэ киирэр.

Айгылаан Григорьев, "Дороги Саха" тэрилтэ суол учаастагын салайааччыта: «Билиҥҥи кэмҥэ биһиги Дежнев уулуссаттан Триумф спорткомплекска дылы аспаал ууран турабыт. Салгыы Каландаришвили уулуссатыгар дылы бэлэмнээтибит, онтон аспаал ууран саҕалыахпыт».

Бу суолу Дежнев уулуссатыттан Октябрьскайга диэри барар учаастагын оҥороллор уопсайа 2 км усталаах.  Бэдэрээччитинэн Дороги Саха тэрилтэ буолар.

Манна эмиэ айан-сырыы хааччахтамматын туһуттан суолу бүтүүннүү саппакка үлэлэри түһүмэхтэринэн ыыталлар. Аны күһүҥҥэ диэри Каландаришвили уулууссатыгар диэри учаастагы аспааллыыр соруктаахтар.

Григорий Новгородов, "Главстрой" тэрилтэ суол тутуутун салаатын салайааччытын солбуйааччы: «Хантараакпытынан бу эбийиэкпит 2027 сылга туттарыллар. Быйыл Дежнев уулуссатыттан Каландаришвили уулуссатыгар дылы оҥоробут».

2025 сылга Саха сиригэр суол өрөмүөнүн үлэтигэр бүтүн 2 млрд солкуобайтан тахса харчы көрүллүннэ. Маныаха суолу-ииһи оҥоруу барыла "Олоххо-дьаһахха аналлаах инфраструктура" национальнай бырайыак иитинэн барар.