Спорт суруналыыһа Василий Посельскай үбүлүөйдээх 75 сааһынан саҥа кинигэтин сүрэхтээтэ

Спорду олоҕун аргыһа оҥостубут, саха спордун сырдатыыга биир солбуллубат суруналыыс, Василий Федорович Посельскай 75 сааһын эмиэ сөбүлүүр дьарыгын кытта көрсөр. Үөрүүлээх тэрээһиҥҥэ спорт эйгэтигэр алтыспыт дьоно муһуннулар. Хас биирдиилээрэ бу күн буруйдааҕыттан кинигэ бэлэх туттулар.

Владислав Коротов, спорт суруналыыһа: «Айымньылаах сыл буолла, 3 кинигэни таһаарда».

Василий Федорович, Кылыйар кырдал ыҥырар диэн саҥа тахсыбыт кинигэтэ бу саха атах оонньууларын туһунан сиһилии суруллубут улахан спорт энциклопедията буолар. Манна кини 1998 сылтан суруйан, хомуйан саҕалаабыт ыстатыйаларын түмэн таһаарда. Оттон атах оонньуулара Василий Посельскай кырдьык да бэйэтэ этинэн-хаанынан билбит көрүҥэ буолар, онон кини бу спорду иһиттэн билэр киһи.

Михаил Друзьянов, спорт түмэлин дириэктэрэ, Василий Посельский атаһа, биир дойдулааҕа: «Кини бастакы Манчаары оонньууларыгар кылыыга бастакы чөмпүйүөн. Спорт историятыгар бастакы Манчаары ооньууларын чөмпүйүөнэ быһыытынан киирэн турар».

Онон Василий Посельскай аата саха спордун историятыгар бастатан туран спортсмен, иккиһинэн спорду сырдатааччы, тарҕатааччы быһыытынан киирэр. Кини 1998 сыллаахтан саха радиотыгар, телевидениетыгар күн бүгүҥҥэ диэри спорду сырдатан кэллэ. Спорду сэҥээрээччилэр истэригэр кини чуор саҥатын истибэтэх киһи диэн суоҕун кэриэтэ. Маны тэҥэ кини бэйэтэ устар, хаартыскаҕа түһэрэр, хаһыаттарга, сурунаалларга ыстатыйалары таһаарар. Дэгиттэр талааннаах суруналыыс.

Василий Посельский, СӨ радиотын уонна телевидениетын туйгуна, спорт суруналыыһа, атах оонньууларыгар спорт маастара: «Сааһым тухары күрэхтэһэбин. Спорду сырдатарым быыһынан, спорт мин сүрэхпэр, өйбөр-санаабар чугас. Элбэх киһини сырдаттым, Саха сирин бастыҥ спортсменнарын, бэтэрээннэрин. Ол барыта матырыйаал буолан сыталлар, кинигэ оҥорон таһаардахпына наһаа үчүгэй буолуо этэ».

Кырдьык да, Василий Федорович 30-ча сылы быһа хомуйбут матырыйаала баһаам элбэх. Бу саха спордун баай историята буолар. Инникитин даҕаны Василий Посельскай саха спортсменнарын ситиһиилэрин киэҥ эйгэҕэ таһаарар, көрөөччүгэ-истээччигэ, ааҕааччыга күүрээннээх күрэстэр туһунан сырдатар үлэтэ салҕанар.