Ил Дархан тутулла турар Арктикатааҕы эпос уонна искусство киинин көрдө-иһиттэ

Ирбэт тоҥҥо аан бастакытын маннык улахан баараҕай эбийиэк киин куоракка дьэндэтиллэ турарын күн бүгүн Өрөспүүбүлүкэ Ил Дархана оробуочай сырыытынан кэлэн бэрэбиэркэлээтэ. Бастатан туран Айсен Сергеевичка саамай улахан сыана көрдөрүллүннэ. Манна аҕа баһылык бэйэтин этиилэрин, киллэриилэрин  тоһоҕолоон эттэ.

Култуурунай кластер салайааччыта Андрей Борисов туттулла турар эбийиэгин сүрүн тутааччы         “ВИС” хампаанньа салалтатын кытары тутуу хаамыытын билиһиннэрдэ. Билигин манна ис барааныгар үлэлэр бара тураллар. Эбийиэк  -  36,7 миэтирэ урдуктээх. Бу курдук үрдүккэ үөһээ тутааччылар үлэ үөһүгэр сылдьаллар. Бүгүҥҥү эбийиэги көрүүгэ оробуочай бөлөх саамай үөһээтигэр тахсан эмиэ үлэ хаамыытын көрдүлэр.

Тутааччылар иһитинэрэллэринэн, култуурунай кластер Арассыыйаҕа эрэ буолбакка, Аан дойдуга суох, ирбэт тоҥҥо туттуулла турар эбийиэк буолар. 33000 кв. миэтирэ иэннээх, олус ураты бырайыактаах, 1500-тан тахса киһи биирдэ олорор миэстэлээх, саҥа сүүрээн мультимедийнай уонна акустика оборуудабанньалаах тутуу дойдуга саҥа тутулла турар. Билигин үлэ саамай сүрүнэ бүппүт.

Алексей Николаев, тутуу прорааба: «Үлэбит этэҥҥэ. 82% бэлэммит. Тас көрүҥ уонна тупсарыы үлэтэ бу сылынан бүтүөхтээх. Уот-күөс, ититии ситимэ аҥара киирэн турар, онно үлэлии сылдьабыт».

Айсен Николаев эбийиэк хас биирдии мэндиэмэнин сиһилии көрдө. Холобура, улахан сыанаҕа балай эмиэ тохтоон, бэйэтин санаатын эттэ.  Тутааччылар маны үлэҕэ ыллыллар.

Андрей Борисов, Арктическай култуурунай кластер генеральнай дириэктэрэ: «Сорудахтары биэртэлээтэ. Филармония саалатыгар оркестровай дьаамалаах, ол үөһээ-аллараа тахсар. Мариинскай театрга баран ыйыталаспыт, кинилэр дьаамалара тыаһы мөлтөтөр эбит, ону биһи толкуйдуохтаахпыт. Уонна манна светодиоднай лентанан оҥоһуллубут Аал Луук Мас баар буолуо».

Бу оробуочай сырыы түмүгүнэн Ил Дархан Айсен Николаев үлэ хаамытын үчүгэйдик сыаналаата. Үөскээбит кыра күчүмэҕэйдэри туоратарга сорудахтаата.