Дьокуускайга ас-үөл уонна оҥорон таһаарыы промышленноһын аан бастакы пуорума ыытылынна

Екатерина Окорокова 8 сыл анараа өттүгэр кейтеринг салаатынан кыра тэрилтэ аһан үлэлэтэн саҕалаабыта. Билигин тэрилтэ бөдөҥ хампаанньаҕа тиийэ үүннэ. Кейтеринг эрэ буолбакка, оскуола үөрэнээччилэрин, устудьуоннары, балыыһаҕа сытар ыарыһахтары хаачыстыбалаах аһынан хаачыйаллар, ону тэҥэ өрөспүүбүлүкэ таһымнаах улахан тэрээһиннэргэ ас-үөл өттүнэн оператор быһыытынан үлэлииллэр. Тэрилтэ салайааччыта Екатерина Окорокова Форумҥа ас салаатыгар бизнеһы кэҥэтии туһунан иһитиннэрии оҥордо.   

Екатерина Окорокова, "Киви" тэрилтэ дириэктэрэ: «Билиҥҥи усулуобуйаҕа туох баар производствобытын барытын автоматизируйдуубут, барытыгар бырагыраамалар тураллар».

Форуму Дьокуускайдааҕы хлебокомбинат иилээн-саҕалаан тэрийдэ. Быйыл тэрилтэ 85 сыллаах үбүлүөйүн бэлиэтиир. Манна өрөспүүбүлүкэ тэрилтэлэрэ эрэ буолбакка, Санкт-Петербургтан, Москваттан тиийэ бэрэстэбиитэллэр кэлэн кытталлар. Тэрээһин 2 хайысханан ыытыллар. Манна процеһы оптимизациялааһын, сыыпаралааһын, персоналы көҕүлээһин, итиэннэ бородууксуйаны салайыы, тарҕатыы боппуруостарын сиһилии ырыталлар. 

Светлана Кынакытова, Дьокуускайдааҕы хлебокомбинат генеральнай дириэктэрэ: «Пуорум икки чаастаах: бастакыта – “Оптимизация бизнес процессов” диэн, иккис чааһа – “ИТ решения”. Иһиттэххэ производтвоҕа туох да сыһыана суох курдук, ол гынан баран производство сайдан иһэр, атын таһымҥа турар. Ону таһынан ИИ киирэн эрэр».

Бырагырааманан дакылааттары истэри таһынан тыынаах кэпсэтии, интерактив буолла. Манна куорат ас-үөл тэрилтэлэригэр олоххо киирбит практическай кейстары көрдүлэр. Этиллибитин курдук ас-үөл, оҥорон таһаарыы промышленноһыгар саҥа технологиялары баһылааһын тыын суолтаны ылар. Афанасий Захаров мобильнай сыһыарыы таҥыытынан ылсан дьарыктанар, кини ИТ хампаанньата дойду үгүс регионун хабан ситиһиилээхтик үлэлиир.

Афанасий Захаров, "Ретейли" айти-хампаанньа салайааччыта: «Мобильнай сыһыарыы оҥоробут ас-үөл оҥорон таһаарар тэрилтэлэргэ уонна оптовай тарҕатааччыларга аналлаах. Саха сириттэн саҕалаан, Камчаткаттан Воронежка дылы үлэлиибит».

ИТ-технология тэрилтэ сайдыытыгар сүҥкэн кылаттаах. Ол курдук оҥорон таһарыы процеһыгар, атыыга, логистикаҕа улахан көмөлөөх. Онон аныгы кэмҥэ, саҥа үнүстүрүмүөннэри, технологиялары баһылааһын хаачыстыбалаах бородууксуйа тахсыытын мэктиэлиир.