"Саха сирэ - дьоруойдар дойдулара" каадыр бырагырааматынан анал байыаннай дьайыы кыттыылаахтара стажировка бараллар

Октябрина Афанасьева анал байыаннай дьайыы саҕаланыан инниттэн Донецкай народнай өрөспүбүлүкэҕэ баҕа өттүнэн тиийэн сулууспатын саҕалаабыта. Октябрина Семеновна анал байыаннай дьайыы инники кирбиитин саамай уотугар - бааһырбыт байыастары эвакуациялыыр салаа хамандыырынан, салгыы көһөрүллэн снайперынан кытта сылдьыбыта. Бу сыл саҕаланыыта бааһыырыы ылан төннөн кэлбитэ. Салгыы Саха сирэ - дьоруойдар дойдулара кадровай бырагыраамааҕа киирэн, сүүмэрдэнэн үөрэҕин бара сылдьар.  

Октябрина Афанасьева, Кэт Марсден аатынан Бүлүү улууһун кырдьаҕастарга уонна инбэлииттэргэ социальнай хааччыйыы анал дьиэтин дириэктэрин солбуйааччы: «3 нэдиэлэ бэйэм министиэристибэбэр сырыттым. Туох баар департаменнарынан, былаан быһыытынан уонна бу 3 нэдиэлэ здравоохранение министиэристибэтигэр сырыттым».

Анал байыаннай дьайыы кыттыылаахтарыгар, кинилэр дьиэ кэргэттэригэр сүрүннэн медицинскэй-психологическэй өйөбүл-көмө күүскэ, эргиччи, бары өтүнэн ыытыллыахтааҕын Октябрина Семеновна бэлиэтиир. Кини бэйэтэ медик идэлээх, Кэт Марсден аатынан Бүлүү улууһун кыдьаҕастарга уонна инбэлииттэргэ социальнай хааччыйыы анал дьиэтин дириэктэрин солбуйааччы, Гражданскай килбиэн бэлиэнэн наҕараадаламмыта.

Бэс ыйын ортотуттан үөрэх саҕаланан ыытылла турар. Бу кэм иһигэр сүүмэрдэммит 25 анал байыаннай дьайыы кыттыылааҕа стажировкаларын аастылар. Хас биирдии министиэристибэҕэ, тэрилтэҕэ исписэлиистэр, салайааччылар үлэ хайдах барарын билиһиннэрэллэр, уопуттарын үллэстэллэр.  Бырагыраама идэ өттүнэн уонна тус сайдыыга кыахтары арыйар.

Георгий Михайлов, СӨ баһылыгын уонна бырабыыталыстыбатын администрациятын салайааччы: «Хаһан да буолбатах кадровай бырагыраама. Ол иһин билбэппит элбэх. Билигин уолаттары кытта тэҥҥэ үөрэниэхпит. Билиҥҥи көрсүһүү кэнниттэн уолаттар элбэх саҥа билиини ыларга бэлэмнэр, ол эрээри кыратык долгуйаллар».

Анал байыаннай дьайыы содулларын туоратыы үлэтэ ураты сыһыаны, тулууру ирдиир үлэ диэн Октябрина Семеновна санаатын үллэстэр. Маныаха бырагыраамаҕа анал байыанай дьайыы кыттыылаахтара үөрэх ааһан салгыы салайыы эйгэтигэр бэйэлэрин уопуттарын үллэстиэхтэрэ.

Октябрина Афанасьева, Кэт Марсден аатынан Бүлүү улууһун кырдьаҕастарга уонна инбэлииттэргэ социальнай хааччыйыы анал дьиэтин дириэктэрин солбуйааччы: «Бэйэбэр наада, тоҕо диэтэргэ, кэнники анал дьайыыга дьоннорго көмөлөһүөм дии саныыбын. Бэйэм уопуппунан, тугу ааспыппынан, эппинэн-хааммынан биллэҕим ди».

"Саха сирэ - дьоруойдар дойдулара" кадровай бырагыраама Ил Дархан иһинэн үлэлиир инновационнай менеджмент Үрдүкү оскуола баазатыгар ыытыллар. Бырагыраама кыттыылаахтара биир сыл устата үөрэниэхтэрэ.