Быйыл Саха сиригэр тэллэй кэмэ хаһааҥытааҕар да эрдэ саҕаланна

Элбэх оҕолоох ийэ Варвара Прибылых сарсыарданы былдьаһа тыаҕа таҕыста. Тымтайын кыбыммытынан, быһаҕын туппутунан айылҕа мааны бэлэҕин үргүү таҕыста. Хара тыа барахсан Варвараны тутатына күндүлээтэ.

Варвара Прибылых, Тулагы-Киллэм нэһилиэгин олохтооҕо: «Тэллэйдэри хомуйаммыт тууһааммыт кыһыммытын наһаа үчүгэйдик көрсөбүт».

Чахчы кыһыыҥҥы томороон тымныыларга, сайыны саныы-ахта тэллэй сиир саҕа күндү суох буолааччы диэн эмиэ тэллэй диэн баран муннукка ытаабыт Июлия Григорьева Варваралыын сөпсөһөр. Июлия билигин уоппускатыгар буолан күннэтэ айылҕалыын алтыһар. Тэллэйи дьиэ кэргэнинэн олус сөбүлүүллэр.

Июлия Григорьева, Тулагы-Киллэм нэһилиэгин олохтооҕо: «Быйыл биһиэхэ тэллэй кэмэ олус эрдэ саҕаланна. Мин күн аайы сылдьабын, 15 мүн. иһигэр бачча элбэх тэллэйи хомуйдум. Биһи тэллэйинэн икра оҥоробут, оҕолор олус сөбүлээн сииллэр уонна маринуйдуубут».

Наука үлэһиттэрэ бэлиэтииллэринэн үгүс сир аһыттан битэмиининэн, туһалаах минералынан уонна клетчакатынан - тэллэй баай буолар. Киһи ис туругун бөҕөргөтөр, хааҥҥа холестерин уонна сахар көрдөрүүтүн намтатар. В уонна D битэмиинэ элбэх, маныаха калий, фосфор уонна медь.

Оттон тэллэй төһө да элбэх туһалаах сүмэһиннээх буоллар, Роспотребнадзор бу көрүҥ сир аһын куттааллаахтарга киллэрэр. Чугас нэһилиэнньэлээх пууннартан хомуйартан туттунарга ыҥыраллар.

Яна Никифорова, Роспотребнадзор Саха сиринээҕи салалтатын санитарнай кэтэбил салаатын кылаабынай исписэлииһэ: «Тэллэйинэн сүһүрүү үксүн тэллэй көрүҥнэрин билбэттэн тахсар. Дьон-сэргэ билбэт эбэтэр дьааттаах тэллэйдэри суоллар кытыыларыгар уонна куорат пааркаларыгар хомуйаллар. Тэллэйдэр курааҥҥа эбэтэр сири пестицидынан, химикаттарынан эмтээбиттэрин кэннэ эмиэ дьааттаах буолуохтарын сөп. Түргэнник буортуйар бородууксуйа буолаллар, онон сылааска харайыман».

Оттон тэллэйдьиттэр бу курдук судуругу быраабылалары тутуһан күһүҥҥэ диэри айылҕа маныылаах бэлэҕин хомуйуо буоллахтара.