Саха сиригэр уу эбийиэктэригэр сэрэхтээх буолуу ыйынньыга салҕанар

Өлүөнэ эбэҕэ киирээти кытары алын суудуналарга инспектордар бастакы суудунаны тохтоллор. Тутатына быыһыыр силиэти көрөн, докумуоннары көрүү саҕаланар. Оҕолору илдьэ сылдьар уу аалын суоппара туга барыта сөрү-сөп, үчүгэйэ билиннэ.

Салгыы үгүс элбэх суудунаны ыытааччылар тохтотолуннулар. Өҥүрүк куйаас буолан Өлүөнэ эбэҕэ сынньаанааччылар, да балыксыттар да үгүстэр. Инспектордар хас биирдиилэрин ымпыктаахтык бэрэбиэркэлээтилэр. Оттон маннык тургутуу Саха сиригэр "Ууга сэрэхтээх буолуу" ыйынньыгын чэрчитинэн ыытыллар.

Татьяна Степанова, РФ ЫБММ салалтатын СӨ уу эбийиэктэригэр куттал суох буолуутун хааччыйар салаа салайааччытын солбуйааччы: «Сыл саҕаланыаҕыттан өрөспүүбүлүкэ үрдүнэн 29 киһи олоҕо ууга былдьанна. Ону тэҥэ 5 сураҕа суох сүттэ. Нам, Булуҥ, Мэҥэ-Хаҥалас, Өлүөхүмэ уонна Хаҥалас оройуоннарыгар. Тимирии сүрүн төрүөттэрэ – көҥүллэммэтэх сирдэргэ сөтүөлээһин түмүгэр уонна суудунанан сылдьан».

Хомойуох иһин, статистика хобдох сыыппарата маннык көрдөрүүлээх. Онон бу хайысхаҕа инспектордар улахан болҕомтолорун уураллар. Чуолаан оҕолору, төрөппүттэри кытары профилактика ыытыллар. Маны кытары тэҥҥэ уу эбийиэктэригэр суудунаны ыытааччылары кытта кытаанах үлэ барар.

Күн бүгүн риэйдэбэй тэрээһиҥҥэ 10-тан тахса суудунаны ыытааччылар тохтотуллуннулар. Бары докумуоннара ылы-чып, быыһыыр силиэттэрэ баара билиннэ. Ол эрэн тустаах биэдэмистибэ  инспектордара ууга сэрэхтээх буоларга ыҥыраллар.

Татьяна Степанова, РФ ЫБММ салалтатын СӨ уу эбийиэктэригэр куттал суох буолуутун хааччыйар салаа салайааччытын солбуйааччы: «Убаастабыллаах өрөспүүбүлүкэ олохтоохторо, суруллубут быраабылалары булгуччу тутуһун, оҕолоргутун көрүүтэ-истиитэ суох хаалларыман. Суудуна ыытааччылара тахсыаххытын иннинэ аалгыт туругун көрүнүн, докумуоннаргытын умнуман».

Ыйынньык чэрчитинэн инспектордар көҥүллэммит уонна көҥүллэммэтэх сөтүөлүүр сирдэргэр риэйдэбэй тэрээһиннэри ыыталлар. Маныаха күүстээх үлэ нэһилиэнньэни кытары барар.