Өрөспүүбүлүкэ үрдүнэн уопсайа 80 тыһ. тахса туонна от оттонно

Халлаан туран биэрэн кэккэ улуустарга от үүнүүтэ куһаҕана суох. Тиэхиникэнэн оттуур буолан түргэн. Ардах да кэмигэр отчуттар таах олорботтор, өрөмүөн игин үлэтин үмүрүтэллэр. Сорох хаһаайыстыбалар былааннарын аҥарын ылан олороллор. Мэҥэ Хаҥалас, Уус Алдан, Үөһээ Халыма, Бүлүү бөлөхтөрө үрдүк көрдөрүүлээх оттуу сылдьаллар. 

Билигин хас биирдии нэһилиэккэ, улууска күнү-дьылы баттаһа оттооһун үгэнэ, былдьаһыктаах күннэр тураллар. Хатас үрдүнэн бу сайын уопсайа 2 тыһыынчаттан тахса туонна оту оттуур сорук турар.

Евгений Пермяков, Хатас нэһилиэгин баһылыга: «Хатаска уопсайа 400-тэн тахса ынах-сүөһү баар, ону таһынан улахан тэрилтэ баар, кинилэргэ 700-тэн тахса төбө баар. Сыыспай сиэллээх 900-кэ баар уопсайа. Былырыын от үүнүүтэ үчүгэй этэ. Быйыл орто соҕус».

Быйыл сайын үгүс улуустарга ардахтаах, тымныы күннэр тураннар кэккэ кыһалҕа баар. Онтон халаан уутуттан улаханнык эмсэҕэлээбит Өймөкөөҥҥө, Муомаҕа уустук балаһыанньа үөскээтэ, Муомаҕа оттуур ходуһалара ууга тураллар. Өймөкөөҥҥө халаан кэннэ эмиэ кыайан оттообокко олороллор. Эргэ саппаас отторо бүтүүннүү ууттан буорту буолбут. Маныаха дьоҕус биригээдэлэр көмөлөрө наада.

Вячеслав Гаврильев, СӨ ТХМ үүнүүгэ уонна материальнай-техническэй хааччыллыыга департаменын салайааччы: «Билигин 10 улуустан сайаапка киирэн турар 20 тыһ. туоннаны оттуурга. Ол гынан баран, ааспыт сылларга 30-35 тыһ. туонна оту син биир мобильнай биригээдэ оттуур этэ. Билигин сайаапкалар киирэллэрин күүтэбит».

Күн-дьыл туһунан этэр эбит буоллахха, атырдьах ыйа бастакы нэдиэлэтэ куйаас күннэринэн саҕаланна. Оттон ааспыт өрөбүллэргэ сорох улуустарга этиҥнээх, тобурахтаах ардахтар аастылар.

Саргылаана Никитина, Дьокуускайдааҕы күнү-дьылы кэтээн көрөр сулууспа күн-дьыл туругун сылыктыыр салаатын салайааччыта: «Кэлэр күннэргэ киин, соҕуруу уонна илин оройуоннарга этиҥнэр өссө да буолуохтара. Сэрэдээттэн Арктикаттан тымныы салгын маассата кэлэр күүтүллэр. Онон, хоту, хотугулуу-илин онтон өрөспүүбүлүкэ үрдүнэн тымныйан барыа. Хотугу оройуоннарга инчэҕэй хаар түһүөн сөп».

Оттон нэдиэлэ бүтүүтэ Приморьеттан сылаас салгын кэлэн, салгыы күннээх, чаҕылхай күннэр туруохтара диэн күнү-дьылы кэтээн көрөөччүлэр сылыктыыллар.