Хас да улууһу ситимниир Нам суолугар өрөмүөн үлэтэ түмүктэнэн эрэр

Улахан кыамталаах тиэхиникэ сир ньуурун тэҥниир. Оттон суолга ардах уута мустубатыгар туһуланар ньыма буолар. Маннык сыырынньалыы оҥоһуллан уу мустубат. Билигин маннык курдук тэтимнээх үлэлэр Нам аартыгын 34-39 км бара тураллар. Оттон суол бэйэтэ  номнуо олоччу өрөмүөннэнэн түмүктүүт түһүмэҕэр тиийбит.

Тустаах эбийиэккэ өрөмүөн үлэлэрэ 5 км 670 миэтирэ устаалаах уһуҥҥа ыытыллыннылар. Сүрүн бэдэрээдчигинэн РИК Автодор хампаанньа, суббэдэрээччигинэн Сэттэлэр ылсан үлэлээтилэр. Оттон бу аартыкка өрөмүөн үлэлэрэ, олох даҕаны 80-с сылларадаахха оҥоһуллубуттара.  Олох урукку, эргэ суол чахчы саҥалыы тыыннанна.

Пётр Атласов, маастар: «Аспаал икки дьапталҕалаах, 5 уонна 7 см курдук. Анна кыырпах таас. Билигин бэлэмнии сылдьабыт, оптуорунньукка туттарыахтаахпыт».

Үлэ тэтимнээхтик баран, кырдьык, болдьоҕу куотааһын баар. Балаҕан ыйыгар туттарыллыахтаах эбийиэк атырдьах ыйыгар түмүктэннэ.

Владимир Томский, СӨ суол салалтатын эксплуатация салаатын салайааччытын солбуйааччы: «Үлэлэр саас саҕаламмыттара. Эһиил бүтүөхтээх үлэлэри эрдэ бүтэрэн эрэбит. Бу аспаал Кэбээйи уонна Нам улуустарын холбуур Дьокуускайы кытта. Мыраан саҕаланыытыттан бүтүөр дылы барыта аспааланна».

Манна даҕатан эттэххэ, Арассыыйа Президенэ Владимир Путин өйөбүлүнэн ыытыллар национальнай бырайыагынан Өрөспүүбүлүкэҕэ уопсайа 137,2 км усталаах региональнай уонна муниципальнай суоллары оҥоруу үлэлэрэ ыытылла тураллар.

Николай Аргунов, СӨ тыраанспар уонна суол хаһаайыстыбатын министиэристибэтин суол сулууспатын департаменын салайааччытын солбуйааччы: «Национальнай бырайыак сүрүн уратыта быйыл кыра 20 тыһ. тахса нэһилиэнньэлээх кыра куорат агломерацияларыгар, ол эбэтэр биһиэхэ – Мииринэй, Лиэнскэй, Алдан, Ньүөрүҥгүрү куораттарга 12км усталаах суоллар оҥоһуллуохтара».

Бу тустаах  аартыгы үлэҕэ киириэн иннинэ  "Росдортехнологии" диэн федеральнай тэрилтэ кэлэн бэрэбиэркэлээтэ. Ол түмүгүнэн бу эбийиэк туох баар техническэй нуормаҕа, ирдэбилгэ барытыгар эппиэтиир диэн туоһуланна. Онон суоппардарга күөх уот умайда.